VaYundeya va kele na ku linga cilika ca Pasovala lia 14 ya ngonde ya Nisane ya nkala muaka. Eci ca va vuluisile vati Yehova ua vovuele ku vundungo mu Ingito na ku va neha mu Cifuti ca va Kulahesele. Mu muaka ua 33 T.K.N., Yesu na vapostolo veni va lingile cilika ca Pasovala mu hondo ya kuilu mu Yelusalema. Mu va manusuile ku lia, Yesu ua handekele ngueni: ‘Umo ha kati kenu a ka nji enda vungungu.’ Vapostolo va vuile ku mitima vo, ngeci vehuile Yesu nguavo: ‘Iya?’ Kaha Yesu ngueni: ‘Uose u nji hana eyi mbolo, ikeye.’ Kaha ua hanene civalavala ca mbolo kuli Yundasa Iskaliota. Ha ntsimbu ize vene, Yundasa ua katukile na ku tuhukamo.

Kaha Yesu ua lingile civundilo, ua pazuile mbolo mu vivalavala, na ku i hana ku vapostolo veni va salele. Kaha ngueni: ‘Lienu eyi mbolo, muomu yemanena muvila uange u nji ka hana omo lienu.’ Kaha ua lingile civundilo ca viniu, na ku vi hana ku vapostolo veni. Ngueni: ‘Nuenu evi viniu, muomu viemanena maninga ange, a nji ka hana linga va kecele milonga ya vantu. Nja mi kulahesa ngecize mu ka pua vamiangana hamo nange muilu. Puenu na ku linga evi muaka ku muaka, mu ku nji vulukilaho ange.’ Vakua Kilistu kasi ve ku likungulula ku vutsiki vua litangua liaco nkala muaka. Ciuano caco matangua ano ve ku ci sana, Mulalelo ua Muangana.

 Mu nima ya mulalelo, vapostolo va putukile ku licokota ku tuala hali iya ua kele na seho ku hiana vakuavo. Vunoni Yesu ua va lekele, ngueni: ‘Ua kama ha kati kenu, uze a limona ku pua ua mundende, ni ua seho ya indende ku hiana vakuavo.

Enu mu vavusamba vange. Muomu nje ku mi leka viose vie ku nji tuma Tata ku mi leka. Vuovuno nji ya kuli Tata muilu. Enu mu ci sala, kaha vantu va tantekeya ngecize mu vandongesi vange omo lia cilemo ci mua kala naco umo ku mukuavo. Mua pande ku lilema umo na mukuavo ngue mu nja mi lema ange.’

Ku ntsongo ya viose, Yesu ua vundilile linga Yehova a niunge vandongesi veni vose. Ua vundilile Yehova a va kuase ku pangela hamo mu ciyulo. Ua vundilile linga lizina lia Yehova va lilelese. Kaha ikeye na vapostolo veni vembile miaso ya ku sangaziala Yehova kaha va tuhukile mu yondo yaco. Ntsimbu ya ku kuata Yesu ya kele mu hiehi.