Yesu omo ua kele hamo na vapostolo veni mu hondo ya kuilu, ua handekele ngueni: ‘Mu vose vutsiki vua lelo mu ka nji seza.’ Petulu ua mu tavele ngueni: ‘Angeni kuahi! Cipue nga vose va ka ku seza, ange ka nji ka ku seza.’ Kaha Yesu ua mu lekele ngueni: ‘Ntsimbu kanda ndemba a tambeke, u ka nji viana vintsimbu vitatu nguove ka u nji zivuka.’

Omo masualale va tualele Yesu ku ndzivo ya Kayafase, cingi ca vapostolo va tinine. Vunoni kua kele lika vavali va mu kavele mu civunga ca vantu. Umo uavo ua puile Petulu. Ua kovelele mu citali ca ndzivo ya Kayafase na ku ota tuhia. Mu ceke ca tuhia, umo ngamba ua mpuevo ua muene Petulu na ku handeka ngueni: ‘Nji ku tantekeya! Ua kele hamo na Yesu.’

Petulu ngueni: ‘Houe, ka nja kele neni! Ka nji tantekeya vi uli na ku handeka!’ Kaha ua suenene mu hiehi na mbelo. Vunoni ngamba mukuavo ua mpuevo ua mu muene na ku handeka ngueni: ‘Ou yala ua kele hamo lika na Yesu!’ Petulu ngueni: ‘Ka nji tantekeya cipue Yesu uaco.’ Kaha umo yala ngueni: ‘Ove nove u umo uavo! Muomu lilimi liove lia solola ngecize u mukua Ngalileya, ngeci mua Yesu.’ Vunoni Petulu ua lisingile ngueni: ‘Ka nji mu tantekeya!’

Haze vene, ndemba ua tambekele. Petulu ua muene Yesu mua tengulukile na ku mu tala. Kaha ua vulukile mezi a Yesu, na ku tuhuka hambandza na ku ka lila cikuma.

Mu ntsimbu ya indende, vakua mpunga ya vakuluntu va tualele Yesu ku ndzivo ya Kayafase. Va tumbile laza ku tsiha Yesu, ngeci va kele na ku mu tondela mulonga. Vunoni ka va mu uanene nauo. Ngeci, Kayafase ua hulile Yesu ngueni: ‘Ove u muana Njambi ni?’ Kaha Yesu ngueni: ‘Yange vene.’ Kayafase ngueni: ‘Mu nevu ku sahula ceni! Ka tu tondeka vukaleho vukuavo naua.’ Ngeci vakua ku sompesa va litavele nguavo: ‘Yala ou na pande ku-tsa.’ Kaha va vetele Yesu vinkusi, va mu  zekuilile malendzi, va mu fuikile ku meso na ku handeka nguavo: ‘Nga u kapolofeto, tu leke iya na ku veta!’

Vunoni omo kua cele, va tualele Yesu ku ndzivo ya vakua ku sompesa na ku mu hula naua nguavo: ‘Ove u Muana Njambi ni?’ Kaha Yesu ua va kumbuluile ngueni: ‘Ngue mu mu na handeka, Yange vene.’ Ngeci haze vene va mu tuikile mulonga na ku mu tuala ku ndzivo ya Pontiu Pilato, nguvulu ua Loma. Vika via hateleko? Tu ci vi tantekeye.