Vasasendote va kama va tualele Yesu ku ndzivo ya nguvulu. Pilato ua va hulile ngueni: ‘Mulonga uka na vulumuna ou yala?’ Kaha nguavo: ‘Ali na ku litumbula ngueni muangana!’ Pilato ua hulile Yesu, ngueni: “Yove Muangana ua vaYundeya, ni?” Yesu ua mu kumbuluile ngueni: “Vuangana vuange kati vua hano ha mavu.”

Kaha Pilato ua tumine Yesu kuli Helonde, muangana ua Ngalileya, ngueni halumo ikeye a ka mu uana na mulonga. Helonde ka mu uanene na mulonga ngeci ua mu hiluisile kuli Pilato. Kaha Pilato ua lekele vantu ngueni: ‘Nange na Helonde ka tua uanene mulonga muli ou yala. Nji mu ecela.’ Civunga ca tambekele nguaco: ‘Mu tsihenu! Mu tsihenu!’ Masualale va tinguile Yesu makote, ku mu zekuila na ku mu veta. Va mu zikile cilongo ca vimbimbo na ku mu tsopa nguavo: ‘Hinduka, Muangana ua vaYundeya.’ Kaha Pilato ua lekele civunga ngueni: ‘Ou yala ka nja mu uanene na mulonga.’ Vunoni vakevo va tambakanene nguavo: ‘Mu sukikenu!’ Ngeci Pilato ua mu hanene linga va ka mu tsihe.

Kaha va tualele Yesu ku cihela ci va luka nguavo Ngolongota, va mu sukika ha citi na ku ci zika mu livu. Yesu ua vundilile ngueni: ‘Tata, vecele ku milonga yavo muomu ka va tantekeya vi va li na ku linga.’ Vantu va tsopele Yesu, nguavo: ‘Nga u Muana Njambi, litundise ha citi! Liohiele ove ivene.’

Umo ua vezi va va sukikile ku mukulo ueni, ngueni: “Yesu, nji vuluke omo u keza mu Vuangana vuove.” Yesu ua mu kulahesele ngueni: “U ka kala hamo lika nange mu citungu ca Njambi.” Ku mutana, kua kele milima ya ambatele viola vitatu. Vamo vandongesi vemanene ku mukulo ua citi, hamo lika na Maliya, naye ya Yesu. Yesu ua lekele Yoano linga a niunge Maliya ngue naye mpundu.

Mu ku manusula, Yesu ua handekele ngueni: “Vi na hu!” Ua kotamene kaha ua sulile muono. Ha ntsimbu ize, kua kele lindunduma lia kama. Kaha ntanga ya ku lema ya tepele Muhela ua  ku Lela ku Muhela ua ku Hiana ku Lela mu tembele, ya tavukile. Umo kapitau ua masualale ua handekele ngueni: ‘Cili vene, nkuma na puile muana Njambi.’