Mu Sesaliya mua kele umo mukuluntu ua masualale va ku Loma lizina lieni Koloneliu. Vutuhu ka puile kaYundeya, vaYundeya va mu singimikile cikuma. Ua kele na ku muesa vuhuanga ku vihutu na vakua ku zela. Koloneliu ua tsilielele muli Yehova kaha ua kele na ku vundila kuli ikeye ntsimbu yose. Tangua limo, umo kangelo ua solokele kuli Koloneliu na ku mu leka ngueni: ‘Njambi nevu vivundilo viove. Vuovuno tuma vamala ku mbonge ya Yopa, ku ali Petulu, linga va ka mu hiange.’ Haze vene, Koloneliu ua tumine vamala ku Yopa, ya kele ha imo 50km, ku mavanda.

Mu ntsimbu oyo, Petulu ua muene cimona ku Yopa. Ua muene tusitu ka va pandele ku lia vaYundeya, vunoni ua vuile lizi li mu tuma a va lie. Petulu ua vianene, ngueni: ‘Kanda nji lie kasitu ua ku zuala mu muono uange.’ Kaha lizi lia mu lekele ngualio: ‘Kati u tumbule ava tusitu nguove va ku zuala. Njambi na va lelesa.’ Kaha va mu lekele nguavo: ‘Ku mbelo yove kuli vamala vatatu. Ya navo.’ Petulu ua ile ku mbelo na ku hula vika va kele na ku tonda vamala vaco. Kaha nguavo: ‘Va na tu tumu kuli Koloneliu, umo mukuluntu ua  masualale mukua Loma. Ngueni u ye ku ndzivo yeni ku Sesaliya.’ Ngeci Petulu ua laniene vaze vamala va kose ku ndzivo yeni vutsiki vumo. Lia mukuavo, ua ile navo ku Sesaliya, hamo na vamo vamuanaye va mu Yopa.

Omo Koloneliu ua muene Petulu, ua tsikamene. Vunoni Petulu ua mu lekele ngueni: ‘Katuka! Nange nji muntu ngeci muove. Njambi na nji tumu ku iza ku ndzivo yove, vutuhu vaYundeya ka ve ku kovela mu vindzivo via Vakua Vifuti. Vuovuno nji leke vika u na nji sanena.’

Koloneliu ua lekele Petulu ngueni: ‘Matangua auana ku nima nja kele na ku vundila kuli Njambi, kaha umo kangelo ua nji lekele ku ku sana. Sukulukambu tu longese mezi a Yehova.’ Petulu ua handekele ngueni: ‘Nja lilongesa ngecize Njambi kati mukua kahangu. Ue ku tava uose a tonda ku mu lemesa.’ Ngeci Petulu ua va longesele viuma via vingi ku tuala hali Yesu. Kaha sipilitu santu yezile hali Koloneliu na vaze va kele neni, kaha vose va va mbatizile.