Vapostolo vononokele lisiko lia Yesu lia ku ambulula muzimbu ua cili mu mavu ose. Mu muaka ua 47 T.K.N., vamuanetu mu Antioka va tumine Paulu na Mbanambasa mu vungendzi vua ku ambulula. Na ntuima ya vusunga, vendanganene mu Asia Menor yose ku vihela ngeci mua Ndeleve, Listala na Ikoniu.

Paulu na Mbanambasa va ambuluile ku vose va va uanene, cipue vampite ni vihutu, vanike ni vakuluntu. Vantu va vengi va tavele vusunga ku tuala hali Kilistu. Omo Paulu na Mbanambasa va ambuluilile kuli nguvulu ua Sipele, Selengiu Paulu, umo cimbanda ua setele ku va vindika. Paulu ua lekele cimbanda uaco ngueni: ‘Yehova a ku luisa.’ Haze vene, cimbanda uaco ua puile kapuputa. Nguvulu Paulu ua puile mukua ku tsiliela omo ua vi muene.

Paulu na Mbanambasa va ambuluile ku vihela viose, ku ndzivo na ndzivo, ha vitanda, mu vitapalo na mu visinangonga. Omo va kanguisile umo cilema mu Listala, vaze va muene cikomoueso caco va singaniekele nguavo Paulu na Mbanambasa va pua vanjambi, kaha va setekele ku va lemesa. Vunoni Paulu na Mbanambasa va va vindikile, nguavo: ‘Lemesenu lika Njambi! Etu tu vantu va ngoco.’ Kaha kuezile vamo vaYundeya va lingisile civunga ku alulukila Paulu. Ngeci va mu asele mavue, na ku mu kokela ku mbandza ya mbonge, kaha va mu sile nguavo na tsi. Vunoni Paulu ka tsile! Vamuanaye vezile vuasi, mu ku mu ohiela na ku mu hiluisa mu mbonge. Mu nima ya ntsimbu, Paulu ua hilukile ku Antioka.

Mu muaka ua 49 T.K.N., Paulu ua ile vungendzi vukuavo. Mua hilukile mu ku ka mona vamuanaye ku Asia Menor, ua tualele  vusunga ku laako, ku Europa. Ua ile ku Atena, Efeso, Filipu, Tesalonika, na vihela vikuavo. Silase, Luka na mukuendze Timoteo navo va ile na Paulu. Va pangelele hamo mu ku sokolola vikungulukilo via viha na ku vi kaniamesa. Paulu ua ka kele ku Kolintu muaka na vingonde vitanu na imo, mu ku kaniamesa vamuanaye va keleko. Ua ambuluile, ua longesele na ku sonekela mikanda ku vikungulukilo via vingi. Kaha naua ua lingile vipanga ngeci mua ku panga vitenda. Mu nima ya ntsimbu, Paulu ua hilukile ku Antioka.

Kaha mu muaka ua 52 T.K.N., Paulu ua ile vungendzi vua mu citatu, ku putukila mu Asia Menor. Ua ile ku laako, ua ka hetele ku Filipu na ku Kolintu. Paulu ua kele miaka ya yingi mu Efeso, mu ku longesa, ku kanguisa na ku kuasa vikungulukilo. Kaha ua hele vimpande matangua ose mu imo hondo ya sikola. Vantu va vengi va mu halakanene na ku alulula vilinga viavo. Mu nima ya ku ambulula muzimbu ua cili mu vifuti via vingi, Paulu ua ile ku Yelusalema.