Omo Yoano tele lipelesu ku lipumbu lia Patemose, Yesu ua mu muesele vimona via ku pua 16, ni vikupulo via viuma via ku lutue. Vimona viaco via soluele vati lizina lia Yehova va ka lilelesa, na vati Vuangana vueni vu keza, kaha na vati cizango ceni va ka ci linga ha mavu ngue muilu.

Mu cimona cimo, Yoano ua muene Yehova ha cituamo ceni ca vumpahu muilu, va na mu zingilika ku vakuluntu 24 va na zala vuzalo vua ku toka na vilongo via olu ku mitue yavo. Ku cituamo caco kua tundile mihiato na cikumo ca kama. Kaha vaze vakuluntu 24 va tsikamene kuli Yehova na ku mu lemesa. Mu cimona cikuavo, Yoano ua muene civunga ca kama ca vantu va ku vifuti viose na malimi ose va lemesa Yehova. Muana Mpanga, ikeye Yesu, ua va niungile na ku va tuala ku mema a muono. Mu mina yaco, mu cimona cikuavo, Yesu ua putukile ku sika ha Vuangana muilu, hamo lika na vakuluntu 24. Mu cimona ca hateleko, Yoano ua muene Yesu ali na ku lua na mukisi, ikeye Satana na vandemone veni. Yesu ua va tundisile muilu na ku va mbila ha mavu.

 Kaha Yoano ua muene cikupulo ca ku vuaha cikuma ca muana mpanga na vantu 144.000 va nemana ha Muncinda ua Siono. Ua muene naua kangelo ali na ku pulula oku a zenguluka mavu, mu ku leka vantu va vuile Njambi vuoma na ku mu Sangaziala.

Mu cimona ca hateleko, ua muene ndzita ya Alemangendo. Mu ndzita yaco, Yesu na masualale veni va vulile Satana na ku sika ceni ca ku pihia. Mu cimona ca ku manusuila, Yoano ua muane ku litombola ca ku tantuluka ca muilu na ha mavu. Satana na mbuto yeni yose va i nongesele. Mu nima yaco, vose va kala muilu na ha mavu va lelesele lizina lia Yehova na ku lemesa lika ikeye.