Mu Filipu, mua kele umo muana mpuevo ua ndungo ua kele na ndemone. Ndemone uaco ua mu puisile mukua ku taha, kaha mu ku lingamo, uze muana mpuevo ua lingisile vakua ku mu fuka ku uana vimbongo via vingi. Omo Paulu na Silase vezile ku Filipu ua kele na ku va kava mu nima matangua a engi. Kaha ndemone ua mu lingisile ku tambakana ngueni: “Vantu ava va na pu vakuamanda va Njambi uze Ua Hiana viose.” Ngeci Paulu ua lekele ndemone ngueni: ‘Mu lizina lia Yesu, tuhuka muli ikeye!’ Kaha ndemone ua tundile muli uze muana mpuevo.

Omo vakua ku fuka uze muana mpuevo va muene ngecize ka va uana vimbongo ku hitila muli ikeye, va nienguele cikuma. Ngeci va tualele Paulu na Silase ku vangazi va mbonge, nguavo: ‘Ava vamala vali na ku pokola masiko na ku neha liuayanga mu mbonge yose!’ Vangazi va tumine vantu va tingule Paulu na Silase na ku va soka mu kamenga. Mukua ku niunga kamenga ua va kovelesele mu kamenga ka mu kati-kati, ka milima na ku va kuta malienge.

Omo vakuavo mapelesu va kele na ku halakana, Paulu na Silase vembile na ku sangala Yehova. Mu kati ka vutsiki, va tungumikile na ku ivua lindunduma lia ningangele kamenga kuilu na ha mavu. Vimbelo via kamenga via sokolokele, na malienge a va kutile mapelesu a zitukile. Mukua ku niunga kamenga ua tuntilile mu kamenga ka mu kati, ua ka uanene vimbelo via casi. Ua singaniekele ngueni mapeleso vose va na tina, ngeci ua kuatele mukuale linga a litsihe.

Haze vene, Paulu ua mu tambakene ngueni: ‘Kati u livulumune! Tu vose tuli muno!’ Mukua ku niunga kamenga ua tuntile na ku tsikama ku meso a Paulu na Silase, ngueni: “Nja pande ku linga vika linga nji kovoke?” Kaha nguavo: ‘Nove na vusoko vuove mua pande ku tsiliela muli Yesu.’ Ngeci Paulu na Silase va va longesele lizi lia Yehova, kaha mukua ku niunga kamenga na vusoko vueni va va mbatizile.