Kua kele umo yala ke ku enda ua puile na ku vundila vukuasi nkala litangua ku mbelo ya ku tembele. Tangua limo ku cinguezi, ua muene Petulu na Yoano va kovela mu tembele. Ua handekele navo ngueni: ‘Sukulukambu nji hanenuko vimo.’ Petulu ngueni: ‘Nji li na vimo via ku ku hana vi hiana vimbongo. Mu lizina lia Yesu, katuka na ku enda.’ Haze vene Petulu ua mu kuasele ku katuka, kaha ua putukile ku enda! Mbunga ya vantu ya kele kuze ya viukililile cikuma omo lia cikomoueso, ngeci va vengi va puile vakua ku tsiliela.

Vunoni vasasendote na vaSanduseo va tenukile cikuma. Va kuatele vapostolo na ku va tuala ku mpunga, kaha nguavo: ‘Iya na mi hana ngolo ya ku kanguisa ou yala?’ Petulu ngueni: ‘Tu na tambula ngolo kuli Yesu Kilistu, uze u mua tsihile.’ Kaha vakuluntu va malombelo va tambakanene nguavo: ‘Likelenu ku handeka via Yesu!’ Vunoni vapostolo nguavo: ‘Tua pande ku handeka vieni. Ka tu ka likela.’

Omo Petulu na Yoano va vecelele, va ile ku vandongesi vakuavo na ku va leka via solokele. Va vundilile kuli Yehova hamo lika, nguavo: ‘Sukulukambu tu hane ku simpa linga tu tualeleleho ku linga cipanga cove.’ Yehova ua va hele sipilitu santu yeni, kaha va tualeleleho ku ambulula na ku kanguisa vantu. Ngeci vantu vavengi va puile vakua ku tsiliela. VaSanduseo va vuile cipululu ca kama ngeci va kuatele vapostolo na ku va soka mu kamenga. Vunoni ku vutsiki, Yehova ua tumine kangelo kua ku sokolola vimbelo via kamenga na ku leka vapostolo ngueni: ‘Yenu ku tembele na ku longesa kuze vene.’

Lia mukuavo ku cimene, vakua mpunga na vakuluntu va malombelo va va lekele nguavo: ‘Kamenga kasi ka ku soka, vunoni vamala va tu na sokelemo vahimo! Vali mu tembele mu ku longesa vantu.’ Ngeci va ka kuatele naua lukuavo na ku va tuala ku  vakua mpunga. Umo sasendote ua kama ua handekele ngueni: ‘Tua mi vindikile ku handeka via Yesu!’ Vunoni Petulu ua kumbuluile ngueni: “Tua pande ku ononoka kuli Njambi ku hiana ku vantu.”

Vakuluntu va malombelo va tenukile cikuma ngeci va tondele ku tsiha vapostolo. Vunoni umo kaFaliseo ua lizina Ngamaliele ua katukile na ku handeka ngueni: ‘Zangamenu! Njambi halumo ali nava vamala. Mu tonda mpundu ku lua na Njambi ni?’ Kaha va tavele cimamuna ceni. Mu nima ya ku veta vapostolo, va va lekele ku likela ku ambulula na ku vecela. Vunoni vipupa ka via lingisile vapostolo ku likela. Va tualeleleho ku ambulula muzimbu ua cili na ku simpa, mu tembele na ku ndzivo ku ndzivo.