Mu nima ya matangua likumi, tunde ha hilukilile Yesu muilu, vandongesi veni va tambuile sipilitu santu. Mu muaka ua 33 T.K.N., vantu va ku tunda ku vihela via ku liseza-seza vezile ku Yelusalema ku cilika ca Pentekosta. Kua kele vandongesi va Yesu va heta ku 120 va likunguluile mu hondo ya kuilu ya imo ndzivo. Kaha cikomoueso ca kama ca va tungumuine. Vimo via ku lifua na mulengi ua tuhia via solokele ha mutue ua nkala ndongesi, kaha vose va putukile ku handeka malimi a ku liseza-seza. Va vuile kalua ka luhundzi lua kama mu ndzivo yaco.

Vangendzi va ku vifuti vieka vaze vezile ku Yelusalema va tuntilile ku ndzivo yaco mu va vuile kalua. Va komokele mu va vuile vandongesi va li na ku handeka malimi eka na eka. Kaha nguavo: ‘Ava vantu vakua Ngalileya. Vati honi vali na ku handeka mu malimi etu?’

Kaha Petulu na vandongesi vakuavo vemanene ku lutue lua civunga. Ngeci Petulu ua va lekele vati Yesu ua tsile na vati  Yehova ua mu sanguile. Petulu ua handekele ngueni: ‘Vuovuno Yesu ali muilu ku livoko lia cilio lia Njambi, kaha na tumu sipilitu santu ya kulahesele. Ngeci mu na mono na ku ivua evi vikomoueso.’

Mezi a Petulu a kuatele cize civunga ca vantu ku mitima, ngeci va hulile nguavo: ‘Vamuanetu, tu ka linga vati?’ Kaha ua va kumbuluile ngueni: ‘Alulukenu ku vipi vienu linga va mi mbatize mu lizina lia Yesu. Kaha nenu mu ka tambula vuana vua sipilitu santu.’ Mu litangua lize va mbatizile vantu 3.000. Tunde litangua lize, vandongesi va putukile ku livuezelela vuasi mu Yelusalema. Na vukuasi vua sipilitu santu, vapostolo va sokoluele vikungulukilo via vingi, linga va hase ku longesa vandongesi viose via va sikile Yesu.