Saulu ua puile mukua Loma ua semukilile mu Talusu. Ua puile kaFaliseo ua tantekeyele vuino Masiko a vaYundeya, kaha ua zindile Vakua Kilistu. Ua ile na ku koka Vakua Kilistu va vamala na va vampuevo mu vindzivo viavo na ku va tuala mu kamenga. Tangua limo uemanene na ku tala omo civunga ca vakua vukenia ca asele Setefanu mavue noho ua tsile.

Vunoni Saulu ka puisilemo ku kuata lika Vakua Kilistu mu Yelusalema. Ngeci ua ka vundilile kuli sasendote ua kama a mu tume ku mbonge ya Ndamasiku linga a ka kuate Vakua Kilistu va keleko. Omo Saulu ua kele ku hiehi na mbonge yaco, ceke ca kama ca mu tuililile, kaha ua uile ha mavu. Ua vuile limo lizi ngualio: ‘Saulu, vika u li na ku nji yandesela?’ Kaha Saulu ngueni: ‘Yove iya?’ Lizi lia mu kumbuluile ngualio: ‘Yange Yesu. Kovela mu Ndamasiku, va ka ku leka vi ua pande ku linga.’ Mu ntsimbu ya indende, Saulu ua puile kapuputa, ngeci vakuavo va mu kuatele ku livoko na ku mu tuala mu mbonge.

Mu Ndamasiku mua kele umo Mukua Kilistu ua Lizina Ananiya. Yesu ua mu lekele mu cimona ngueni: ‘Ya ku ndzivo ya Yunda mu njila i va luka nguavo ya ku Sungama, u ka tonde Saulu.’ Kaha Ananiya ngueni: ‘Muangana, yala uaco nji mu tantekeya vuino! Ikeye ali na ku mbila vandongesi vove mu kamenga!’ Vunoni Yesu ngueni: ‘Yako lika. Nji na hangula Saulu a ka ambulule muzimbu ua cili ku vifuti via vingi.’

Ngeci Ananiya ua ka tondele Saulu na ku mu leka ngueni: ‘Muanetu Saulu, Yesu na nji tumu ku ku imuisa meso.’ Haze vene, Saulu ua putukile naua ku mona. Ua lilongesele via Yesu na ku pua mukua ku mu kava. Mu nima ya ku mu mbatiza a pue Mukua Kilistu, Saulu ua putukile ku ambulula mu visinangonga, hamo na vakuavo Vakua Kilistu. Ua tantekeya vuoma na  ku pihia ku mutima ci va vuile vaYundeya mu va muene Saulu a longesa vantu via Yesu ni? Va handekele nguavo: ‘Ou kati ikeye uze yala ua kele na ku kuata vandongesi va Yesu ni?’

Mu miaka itatu, Saulu ua ambuluile muzimbu ua cili ku vantu va tungile mu Ndamasiku. VaYundeya va zindile Saulu ngeci va likuminyine ku mu tsiha. Vunoni vamuanaye va tantekeyele via vutumbe vuaco. Ngeci va mu hakele mu cikasa na ku mu sosa na mukole ha civumbe ca mbonge.

Omo Saulu ua ka hetele ku Yelusalema, ua setekele ku lipandakana kuli vamuanaye va keleko. Vunoni va mu vuilile vuoma. Kaha umo ndongesi ua ngozi, lizina lieni Mbanambasa, ua tualele Saulu ku vapostolo na ku va languluila viuma linga va tave ngecize Saulu na aluluka mpundu. Saulu ua putukile ku ambulula muzimbu ua cili na ntuima hamo lika na cikungulukilo mu Yelusalema. Mu nima ya ntsimbu, va mu tantekeyele na lizina lia Paulu.