Tangua limo omo Eva ua kele lika lieni, umo linoka ua handekele neni. Ngueni: ‘Cili vene Njambi na mi vindika ku lia ku vusuka vua miti yose ni?’ Kaha Eva ngueni: ‘Ku miti yose citava tu lie, ku tundisako umo lika. Nga tu lia ku muti uaco, tu tsa.’ Ngeci linoka ua handekele ngueni: ‘Houe ka mu tsi. Nga mu liako mu ka lifua na Njambi.’ Vusunga ua handekele ni? Kuahi, visaki. Vunoni Eva ua tavele. Ngeci ua putukile ku talako ntsimbu yose, kaha cizango ca ku liako ca kolele mu mutima ueni. Mu nima yaco, Eva ua lile ku vusuka vuaco na ku hanako yalieni Andama. Andama ua tantekeyele ngecize nga ka vononoka lisiko lia Njambi va tsa. Vutuhu ngoco ua lileko.

Mu nima ya ntsimbu, ha litangua lize vene, Yehova ua handekele navo. Ua va hulile omo lia vika ka vononokele ku mezi eni. Eva ua vangeyele linoka, kaha Andama ua vangeyele Eva. Mu ku linga va Andama na Eva ka vononokele, Yehova ua va tundisile mu citungu. Ka tondele va hilukile mu citungu, ngeci ua hakele tungelo na mukuale ua tuhia ku vukovelelo.

Yehova ua handekele ngueni uose uongele Eva neni a ka mu hana kasitiku. Kati linoka mpundu ua handekele na Eva. Muomu Yehova ka tangele manoka linga va pue na ku handeka. Kua kele umo kangelo ua mupi ua tondele ku onga Eva, ngeci ua lingisile linoka ku handeka. Kangelo uaco lizina lieni Satana Ndiavu. Ku lutue, Yehova tangua a ka nongesa Satana linga kati a ka tualeleleho ku onga vantu mu ku linga vupi.