Noa na vusoko vueni na tusitu va kovelele mu vuato. Yehova ua sokole mbelo kaha niondzi ya putukile ku noka. Niondzi ya nokele cikuma ngeci vuato vua putukile ku hungumuka. Kaha ha mavu ose ha sulile na mema. Vantu vose va kele ha mbandza ya vuato va tsile. Vunoni Noa na vusoko vueni ka va tsile muomu va kele mu kati ka vuato. Aci singanieke ndzolela i va vuile omo lia ku ononoka Yehova!

Niondzi ya nokele matangua 40 na matsiki 40, kaha ya cele. Mu nima yaco mema a putukile ku tepuluka. Kaha vuato vua ka kundamene ku muncinda. Vunoni ha mavu hose ha kele mema, ngeci Noa na vusoko vueni ka va hasele ku tuhuka mu vuato ha ntsimbu ize vene.

Kamandende kamandende mema a putukile ku uma. Noa na vusoko vueni va kele mu vuato ntsimbu ya ku tuvakana muaka. Mu nima yaco, Yehova ua va lekele ku tuhuka mu vuato, kaha va yoyelele mu mavu a cili ngue mavu a aha. Va santselele cikuma Yehova mu ku vovola, ngeci va mu muesele ku santsela cavo mu ku hana cikombelo kuli ikeye.

Cikombelo cavo ca ile Yehova ku mutima. Ua va kulahesele ngueni ka ka nongesa naua viuma viose na livazi. Kaha ua soluele nkongolo ya katete muilu, ku pua cimueso ca cikulaheso ceni. Ua monaho laza nkongolo ni?

Kaha Yehova uasikile Noa na vusoko vueni ku sema na ku sulisa mavu.