Avilahama ua longesele muaneni Isake ku lema Yehova na ku kulahela mu vikulaheso viose via Yehova. Vunoni omo Isake tele a lingila ku puisa miaka 25, Yehova ua tumine Avilahama ku linga cuma ca cikalu cikuma. Vika ua mu tumine ku linga?

Njambi ua lekele Avilahama ngueni: ‘Ambata muanove umo lika, u ka mu kombeleye kuli yange ku muncinda ua cifuti ca Moliya.’ Avilahama ka tantekeyele omo lia vika Yehova ua mu tumine ku linga evi. Vunoni kasi uononokele Yehova.

Ku cimene ca hateleko, Avilahama ua ambatele Isake na vangamba vavali, kaha va ile ku Moliya. Mu nima ya matangua atatu va muene mincinda ha laako. Kaha Avilahama ua lekele vangamba veni ku va va vandamena, omo ikeye na Isake va ile mu ku hana cikombelo. Avilahama ua hele cisua ca vikuni kuli Isake linga ambate, kaha ikeye ua ambatele mpoko. Kaha Isake ua hulile ise ngueni: ‘Tata! Kulihi ali kasitu u tu ka kombeleya?’ Kaha Avilahama ngueni: ‘Yehova a ka tu hanaye, muanange.’

Omo va ka hetele ku muncinda, va tungile mutula. Kaha Avilahama ua kutile Isake ku mavoko na ku mikono na ku mu haka ha mutula.

Kaha Avilahama ua tambuile mpoko. Haze vene, kangelo ua Yehova ua tambekele ku fuma muilu ngueni: ‘Avilahama! Kati u saleke livoko liove ha kanike! Vuovuno nji na tantekeya ngecize ua mu vuila  vuoma Njambi, muomu ka ua vianene ku kombeleya muanove ku cizango.’ Kaha Avilahama ua muene cizamba ua kasitu na lizenge vimbinga mu ciputa. Kaha ua zituile vuasi-vuasi Isake na ku kombeleya uze kasitu.

Fuma ha litangua lize, Yehova ua mu tumbuile kavusamba keni. Ua tantekeya omo lia vika? Muomu Avilahama ua lingile viose via mu lekele Yehova ku vi linga, ambe nga ka tantekeyele vika Yehova ua mu tuminine ku lingamo.

Yehova ua hilukilile naua cikulaheso ceni kuli Avilahama ngueni: ‘Nji ka ku vezikisa, na ku lanesa mbuto yove.’ Eci ca lombolokele ngecize Yehova a ka vezikisa vantu vose va cili ku hitila mu vusoko vua Avilahama.