CILONGESA 8
Avilahama na Sala Vononokele Njambi
Mbambele ya kele ku hiehi na Mbonge ya Ule. Ku mbonge yaco kua kele vantu va lemesele vanjambi veka va vengi, kati Yehova. Vunoni mu Ule mua kele umo yala ua lemesele lika Yehova. Lizina lieni Avilahama.
Yehova ua lekele Avilahama ngueni: ‘Fuma ku cifuti cove na vusoko vuove, na ku ya ku cifuti ci nji ka ku leka.’ Njambi ua mu kulahesele ngueni: ‘Nji ka ku puisa cifuti ca kama, kaha nji ka hana viuma via cili ku vantu va vengi omo liove.’
Avilahama ka tantekeyele kuiko ue ku mu tumine Yehova, vunoni ua kulahelele muli Yehova. Ngeci Avilahama na mpueyeni Sala, na ise Tela, kaha na muihua ueni Lote va longekeyele vitenga viavo, kaha va ile vungendzi vua laha.
Avilahama tele ali na miaka 75 omo ikeye na vusoko vueni va ka hetele ku cifuti ca va lekele Yehova. Lizina lia cifuti caco Kanana. Kaha kuze Njambi ua handekele na Avilahama na ku mu kulahesa ngueni: ‘Cino cifuti, nji ka ci hana kuli vana vove.’ Vunoni va Avilahama na Sala va puile tusinakazi, kaha ka va kele na muana na umo uahi. Vati Yehova ua puisilemo cikulaheso ceni?
“Ha ku tsiliela, Avilahama, omo va mu sanene, uononokele mu ku ya ku cifuti cize ci va ambele ku mu hia ku ci suana; kaha ua ile, ka tantekeyele kulihi a ya.”—VaHevelu 11:8
