Mu nima ya livazi, vana va Noa na vampuevo vavo va kele na vana va vengi. Vusoko vuavo vua kolele, kaha va putukile ku ka tungila ku vihela via ku liseza-seza ngue mua va lekele Yehova.

Vunoni vamo vantu ka vononokele Yehova. Ngeci va handekele nguavo: ‘Tu litungilienu limbo na cimpaka ca ku tuntuka, ntsongo yaco i hete muilu. Linga tu tsimane.’

 Yehova ka viukililile na viuma vi va kele na ku linga vantu, ngeci ua vemikile. Ua tantekeya vati ua lingile? Ua va lingisile ku handeka malimi a ku liseza-seza. Kaha mu ku linga ka va kele na ku litavasiana, va likelele ku tunga. Mbonge i va putukile ku tunga va i lukile nguavo Mbambele ya lomboloka “Citanganeso.” Kaha vantu va putukile ku lisanduoka na ku yoyela ha mavu ose. Vunoni va putukile naua ku linga via ku pihia ku vihela vi va ka tungile. Vuno kasi kua kele umo ua lemene Yehova ni? Tu ka mu tantekeya mu cilongesa ci na hatako.