Avilahama na Sala va kele na miaka ya ingi mu vulo. Va sile ndzivo yavo ya cili ku Ule, kaha va ka yoyelele mu mbalaka. Vunoni Sala ka kele na ku tatuoka, muomu ua kulahelele muli Yehova.

Sala ua tondele cikuma ku kala na muana, ngeci ua lekele Avilahama ngueni: ‘Nga Hangale ngamba yange a sema muana, nji ka mu puisa ngue muanange.’ Mu nima ya ntsimbu, Hangale ua semene muana ua yala. Lizina lieni Ismaele.

Mu nima ya miaka ya ingi, tele Avilahama ali na miaka 99, kaha mpueyeni Sala 89, va tambuile vangendzi vatatu. Avilahama ua va laniene va tulile muintsi lia muti linga a va hane via-ku-lia. U tantekeya veya va puile vangendzi vaco? Va puile tungelo! Va lekele Avilahama nguavo: ‘Muaka u tu kuata, ku ntsimbu ino, mu ka kala na muana ua yala.’ Sala tele ali mu mbalaka vunoni uevuileko. Kaha ua zolele mu mutima ueni ngueni: ‘Ange nja kulupa ngeci, nji hasa ku sema muana?’

Muaka ua hateleko, Sala ua semene muana ua yala ngue mu va sikile tungelo. Avilahama ua mu lukile ngueni Isake. Lizina liaco lia lomboloka “Vizolo.”

 Isake tele a lingila ku puisa miaka 5, Sala ua muene Ismaele a mu pakesa. Kaha Sala ua tondele ku ohiela muaneni, ngeci ua lekele Avilahama linga a sekule Hangale na muaneni Ismaele ha ndzivo. Ha katete, Avilahama ka tavele. Vunoni Yehova ua mu lekele ngueni: ‘Halakana ku lizi lia Sala. Nji ka niunga Ismaele, vunoni vikulaheso viange vi ka lipuisamo hali Isake.’