Isake ua kele na miaka 40 mua ambatele Lembeka. Isake ua lemene cikuma mpueyeni Lembeka. Kaha va semene vampasa vavali va vamala.

Ua mukuluntu lizina lieni Esau, ua kanike Yakomba. Esau ua lemene kuya mu musenge, kaha ua puile ciyambi ua vutongue. Vunoni Yakomba ua lemene ku kala hembo.

Ku matangua aze, muana ua ndala va kele na ku mu hana mehia na vimbongo, mu nima ya ku-tsa ca ise. Ovu vupite vuaco va vu lukile nguavo vusuana. Mu vusoko vua Isake, vupite vuaco vua puile naua ku ka tambula vikulaheso via sikile Yehova kuli Avilahama. Esau ka hakele seho ku vikulaheso viaco, vunoni Yakomba ua tantekeyele ngecize via puile via seho ya kama.

Tangua limo, Esau ua ile ku laako mu vuyambi ngeci ua honene cikuma. Kaha mua ku hetele hembo, ua vuile vueko vua via-ku-lia via cili via kele na ku teleka Yakomba. Ngeci ua mu vundilile ngueni: ‘Nji na tsi ndzala! Nji haneko via-ku-lia via ku tila vi u teleka!’ Vunoni Yakomba ngueni: ‘Ha katete, aci tave ku nji hana vusuana vuove.’ Kaha Esau ngueni: ‘Vusuana vu nji kuasa ku vika, ambata ngano. Ange via-ku-lia lika nji tonda.’ Mu ku mona cove, Esau ua puile ua ku zangama mu ku handeka ngoco ni? Houe.  Muomu ua hanene cuma ca seho ya kama omo lia via-ku-lia via ngoco.

Omo Isake ua kulupile cikuma, ntsimbu ya hetele ya ku vezikisa muaneni ua ndala. Vunoni Lembeka ua kuasele muaneni ua mu civali, Yakomba ku tambula civezikiso caco. Omo Esau ua vi tantekeyele ua nienguele cikuma, kaha ua likuminyine ku tsiha ntsongo yeni. Vunoni Isake na Lembeka va tondele ku mu ohiela, ngeci va mu lekele nguavo: ‘Tinina kuli nokontu, Lambane, noho vutenu vua Esau vu na hiti.’ Yakomba uononokele eci cimamuna ca visemi veni, ngeci ua tinine.