Mosesa ua yoyele mu Mindiane miaka 40. Ua ambatele mpuevo na ku sema vana. Tangua limo omo ua kele na ku niunga vampanga veni ha mu hiehi na Muncinda ua Sinai, ua muene vimo via ku komouesa. Cimo ciputa ca kele na ku sukuma, vunoni ka ca uemene! Omo ua sueneneko, ua vuile limo lizi mu kati ka ciputa, ngualio: ‘Mosesa! Kati u heteko kuno. Sulula zinkaku ziove muomu uli ha cihela ca ku lela.’ Yehova ikeye ua kele na ku handeka neni ku hitila mu kangelo.

Mosesa ua vuile vuoma, ngeci ua lifuikile ku meso. Kaha Lizi lia handekele naua ngualio: ‘Nji na mono tuyando tua vaIsaleli. Nji ka vohiela kuli vakua Ingito na ku va neha ku cifuti ca cili. Yove u ka va tuamenena ku tunda mu Ingito.’ Mu ku mona cove, eci ca komouesele Mosesa, ni vati?

Mosesa ua hulile ngueni: ‘Vika nji ka va leka nga vantu va ka nji hula nguavo iya na ku tumu?’ Njambi ua mu kumbuluile ngueni: ‘U ka va leka nguove Yehova, Njambi ya Avilahama, Njambi ya Isake na Njambi ya Yakomba ikeye na nji tumu.’ Kaha Mosesa ngueni: ‘Vati co nga ka va ka nji halakana?’ Yehova ua mu muesele cimo cimona ca muesele ngecize a ka mu kuasa. Ua mu lekele a mbile mulamu ueni ha mavu. Kaha mulamu ua himpukile linoka! Omo Mosesa ua kuatele ku mucila ua linoka, linoka lia himpukile naua mulamu. Yehova ngueni: ‘Mu u ka linga evi vikomoueso, ci ka muesa ngecize yange nji na ku tumu.’

Mosesa ua handekele ngueni: ‘Ange ka nje ku handeka vuino.’ Kaha Yehova ua mu kulahesele ngueni: ‘Nji ka ku leka vi u ka handeka, na ku ku tuma muanoko Alone linga a ka ku kuase.’ Mu ku tantekeya ngecize Yehova a ka mu kuasa, Mosesa na mpueyeni na vana veni va hilukile ku Ingito.