Omo Yosefe ua kele mu kamenga, muangana ua Ingito, Falao, ua kele na vimo vilota, kaha na umo uahi ua hasele ku vi lombolola. Kaha umo ua vangamba veni ua mu lekele ngecize Yosefe a hasa ku lombolola vilota vieni. Haze vene Falao ua tumine ku ka neha Yosefe.

Falao ua mu hulile ngueni: ‘U hasa ku nji lomboluela vilota viange?’ Kaha Yosefe ua lekele Falao ngueni: ‘Mu Ingito mu ka kala via ku-lia via vingi miaka 7, kaha naua ku ka kala miaka 7 ya ndzala. Hangula umo yala ua mangana a niunge via ku-lia linga vantu vove kati va ka landuke ku ndzala.’ Kaha Falao ngueni: ‘Nja ku hangula yove! U ka pua yala ua mu civali ua seho ya kama mu Ingito!’ Vati Yosefe ua tantekeyele vi via lombolokele vilota via Falao? Yehova ua kuasele Yosefe.

Mu miaka 7, Yosefe ua tulikile via ku-lia via vingi. Kaha mu mavu ose mua kele ndzala ya kama, ngue mua handekele Yosefe. Vantu va tundile kuose linga va ku lande via ku-lia kuli Yosefe. Omo Ise Yakomba ua vuile ngecize ku Ingito kua kele via ku-lia, ua tumine vana veni 10 linga vayeko mu ku ka landa.

Vana va Yakomba va ile kuli Yosefe, kaha ikeye ua ka va tantekeyele vuasi. Vunoni vamuanaye ka va mu tantekeyele. Va ka tsikamene kuli ikeye ngue mua vi lotele ku vunike. Yosefe ua tondele ku tantekeya nga vamuanaye kasi va mu zindile. Ngeci ua va lekele ngueni: ‘Enu mu vandondzi. Mu neza kua ku mona muzi ua cifuti.’ Kaha vakevo nguavo: ‘Houe! Etu tua puile vana 12 va ku cifuti ca Kanana. Muanetu umo ua tsa, kaha ua kasulantsongo na sala na  tatetu.’ Kaha Yosefe ngueni: ‘Ka nehenu kuno kasulantsongo kenu, kaha nji ka mi tava.’ Kaha va hilukile kuimbo kuli iseavo.

Omo vusoko vua Yakomba via ku-lia via va huile, Yakomba ua tumine naua vana veni ku Ingito. Ha ntsimbu eyi va ile na Mbenjamini kasulantsongo uavo. Mu ku eseka vamuanaye, Yosefe ua tambuile ngandza yeni ya palata na ku i haka mu njeke ya Mbenjamini, kaha ua va vangeyele ngueni va na pundu. Omo vangamba va Yosefe va uanene ngandza mu njeke ya Mbenjamini, vamuanaye ca va tangele. Va lambelele Yosefe a va hane vakevo kasitiku kati Mbenjamini.

Haze vene Yosefe ua tantekeyele ngecize vamuanaye va na aluluka. Ngeci Yosefe ua vuile cikuma vusiua ka hasele naua ku lisueka. Ua putukile ku lila na ku handeka ngueni: ‘Yange Yosefe, ntsongo yenu. Tata kasi ali na muono?’ Vamuanaye va komokele cikuma. Kaha ua va lekele ngueni: ‘Kati mu livue mua ku pihia omo lia vi mua nji lingile. Njambi ua nji tumine kuno nja ku ovole miono yenu. Kaha vuovuno zangulenu mu ka nehe tata kuno.’

Kaha va ile ku ndzivo na ku ka leka iseavo muzimbu ua cili na ku mu neha ku Ingito. Vutuhu mua hitile miaka ya ingi, Yosefe na ise va kale hamo lika naua.