Ku cifuti ca Uze kua kele umo yala ua puile mukua ku lemesa Yehova. Lizina lieni Yombi. Ua puile mpite kaha ua kele na vusoko vua kama. Ua puile mukua ngozi, kaha ua kuasele vihutu, vampuevo va tsisile vamala, na vanike ka va kele na visemi. Vuno mu ku pua mukua vuoloke ka pandele ku hita mu visoti na vimo viahi ni?

Satana ua kele na ku tala Yombi, vunoni Yombi ka vi tantekeyele. Kaha Yehova ua lekele Satana ngueni: ‘U na mono ngamba yange Yombi ni? Ha mavu ka hesi ueka ngeci mueni. Ue ku nji ononoka na ku linga via cili.’ Satana ua kumbuluile ngueni: ‘Cili vene Yombi ue ku ku ononoka. Muomu ue ku mu niunga na ku mu vezikisa. Ua mu hana cihela ca kama na tusitu. Vunoni nga u mu niekavio, a likela ku ku lemesa.’ Kaha Yehova ua handekele ngueni: ‘Citava u eseke Yombi. Vunoni kati u mu tsihe.’ Vika Yehova ua taveselele Satana ku eseka Yombi? Muomu ua kulahelele ngecize Yombi ka ka likela ku mu pangela.

Satana ua putukile ku yandesa Yombi na vieseko via vingi. Ha katete ua tumine vamo vantu va va tumbuile nguavo vaSaveya va ka mu punde vangombe na vimulu. Kaha tuhia tua tsihile vampanga veni vose. Kaha naua civunga cikuavo ca vaKalendeya ca ku pundile tumelu veni. Mu nima yaco, va tsihile tuniungi va kele na ku lisa vimuna vaco. Kaha mu nima ya viose evi, Yombi ua tambuile muzimbu ua ku pihia cikumakuma: Vana veni vose va tsile, omo ndzivo i va kele na ku lingila cilika ya va lundumukilile. Yombi ua vuile ku vavala ca kama ku mutima, vunoni ka likelele ku pangela Yehova.

Satana kasi ua tondele ku vueza ku vieseko via  Yombi. Ngeci ua mu kokelele vimbandu via ku vavala cikuma muvila uose. Yombi ka tantekeyele vika ua kele na ku hitila mu lamba ya ku pua haze. Vutuhu ngoco kasi ua lemesele Yehova. Eci ca vuisile Yehova ndzolela ya kama, muomu ua muene viose via kele na ku hita Yombi.

Satana ua tumine naua, vamala vatatu linga va keseke Yombi. Va mu vangeyele nguavo: ‘Halumo Njambi ali na ku hana kasitiku muomu ua lingile vupi mu vusueke.’ Yombi ua va kumbuluile ngueni: ‘Ka nja lingile vupi na vumo vuahi.’ Vunoni mu nima yaco, Yombi ua putukile ku singanieka ngueni Yehova ikeye ua kele na ku mu kokela visoti. Ngeci ua muene ngecize Yehova ka mu vuilile ngozi.

Vunoni kua kele umo mukuendze ua lizina Elihu, ua kele na ku halakana ku simutuila ca Yombi na vaze vamala vatatu. Kaha ua handekele ngueni: ‘Mu vose mu na handeka via ku pihia. Ka tu hasa ku ivuisisa vukama vua Yehova. Kaha Yehova ka hasa ku linga vuhenge. Vunoni ue ku mona viose, kaha ue ku kuasa vantu nga vali mu visoti.’

Kaha Yehova ua handekele na Yombi, ngueni: ‘Yombi, mu nja tangele melu na mavu ua kele kulihi? Vika via ku lingisa ku handeka nguove ka nja kele na ngozi? Uli na ku handeka ngoco, vunoni ka u tantekeya omo lia vika evi viuma vi li na ku ku solokela.’ Yombi ua tavele ku sevuka ceni ngueni: ‘Nja sevukile. Laza nja ku vuile lika, vunoni nji na ku tantekeya honi. Ka kuesi viuma vi u honoua ku linga. Nji ecele ku viuma vi nja handekele.’

Mu via huile vieseko viose, Yehova ua kanguisile Yombi na ku mu hana vupite ku hiana vua kele navuo ha katete. Yombi ua yoyele mu ndzolela miaka ya ingi. Yehova ua vezikisile Yombi omo lia ku mu ononoka ambe mu vintsimbu via vikalu. Nove u pua ngeci mua Yombi mu ku tualelelaho ku lemesa Yehova, ambe ku ize visoti via ku fua vati ni?