Yosefe ikeye ua puile umo ua vana va Yakomba ua kanikeho. Vunoni vamuanaye va muene ngecize iseavo ua lemene cikuma Yosefe. Vati va livuile omo va muene ngecize? Va mu vuilile cipululu na ku mu zinda. Omo Yosefe ua lotele viuma via ku komouesa, ua lekeleko vamuanaye. Vunoni va singaniekele nguavo vilota viaco via lombolokele ngecize tangua limo va ka tsikama kuli ikeye. Ngeci va mu zindile cikuma!

Tangua limo vamuanaye ya Yosefe va kele na ku lisa vampanga mu hiehi na mbonge ya Sekeme. Kaha Yakomba ua tumine Yosefe a ka tale vati vali vamuanaye. Ha laako va muene Yosefe ali na ku iza, kaha va handekele ku umo na mukuavo nguavo: ‘Talenu muaka vilota uze eza! Tu mu tsihenu.’ Mua hetele va mu kuatele na ku mu mbila mu cina ca ku lova. Vunoni Yunda, umo ua vamuanaye, ngueni: ‘Kati mu mu tsihe! Tu mu landesenu a ka pue ngamba.’ Ngeci va landesele Yosefe na 20 ya vimbongo via palata ku vakua mavenda va vaMindiane va kele na ku ya ku Ingito.

Kaha vamuanaye ya Yosefe va mbuitikile cikovelo ceni mu maninga a mpembe na ku ci tuma kuli iseavo, nguavo: ‘Eci kati cikovelo ca muanove?’ Kaha Yakomba ua singaniekele ngueni Yosefe na liua ku kasitu ua mu musenge. Ua vuile ku vavala cikuma ku mutima. Na umo uahi ua hasele ku mu lembezieka.

Mu Ingito, Yosefe va ka mu landesele ku pua ngamba kuli umo muata ua lizina Potifale. Vunoni Yehova ua kela na Yosefe. Potifale ua muene Yosefe ku pua mukua vucili ha vipanga vieni, kaha citava ku mu kulahela. Ngeci Potifale ua mu hele mpoko ya ku tuamenena viuma viose via pitile.

Mpuevo ya Potifale ua muene ngecize Yosefe ua puile ua ku vuaha, kaha ua ku kaniama. Tangua ku tangua ua mu vundilile ku kosa neni.  Vati Yosefe ua lingile? Ua vianene na ku handeka ngueni: ‘Houe! Eci ka ca viukile! Sukuluange ua nji kulahela, kaha ove u mpuevo yeni. Nga nji kosa nove, nji ka linga vupi ku meso a Njambi!’

Kaha tangua limo, mpuevo ya Potifale ua setekele ku sindiya Yosefe ku kosa neni. Ua mu kuatele mu vikovelo, vunoni Yosefe ua tinine. Omo Potifale ua hetele hembo, mpueyeni ka handekele vusunga, ua mu lekele ngueni Yosefe ua tondele ku kosa neni. Ngeci Potifale ua tenukile cikuma na ku soka Yosefe mu kamenga. Vunoni Yehova ka suvile Yosefe.