VaIsaleli va kele mu vindinda kampe miaka 40. Va vulile vimbonge via vingi via ngolo. Vunoni mu va ku tulile mu viana via Moave ku hiehi na Ndonga Yondau, ya puileho ntsimbu ya ku kovela mu Cifuti ci va va Kulahesele. Ngeci Mbalake, muangana ua Moave, ua vuile vuoma vua ku mu nieka cifuti ceni kuli vaIsaleli. Ngeci mukemuo, ua kumuine umo yala ua lizina Mbalame, eze ku Moave linga a ku singe vaIsaleli.

Vunoni Yehova ua lekele Mbalame ngueni: ‘Kati u ka singe vaIsaleli.’ Ngeci Mbalame ua vianene kuyako. Vunoni Muangana Mbalake ua mu laniene lua mu civali na ku mu leka ngueni a ka mu hana viose via tonda. Vutuhu ngoco, Mbalame kasi ua vianene. Kaha Njambi ua mu lekele ngueni: ‘Citava u ye, vunoni u ka handeka lika vize vi nji ka ku leka.’

Kaha Mbalame ua londele ha cimulu ceni na ku talekesa ku Moave. Ua kele na vutumbe vua ku ka singa vaIsaleli, vutuhu Yehova ua mu vindikile ku lingamo. Ngeci kangelo ua mu solokelele lutatu mu njila. Mbalame ka muene kangelo uaco, vunoni cimulu ceni ua mu muene. Ha katete, cimulu ua tundile mu tapalo na ku kovela mu musenge. Lua mu civali, cimulu ua suenene ku livue, na ku tseka ciliato ca Mbalame. Lua mu citatu, cimulu ua vutamene ha kati ka tapalo. Mu vintsimbu vitatu viose, Mbalame ua tinguile cimulu ceni makote.

Vunoni mu ntsimbu ya mu citatu, Yehova ua lingisile cimulu ku handeka. Cimulu ua hulile Mbalame ngueni: ‘Vika uli na ku nji tinguila nkuma? Kaha Mbalame ngueni: ‘Muomu u na nji mono vuheve. Nga nji na kala na mukuale nga nji na ku tsihi.’ Kaha cimulu ngueni: ‘U na nji endela miaka ya ingi. Nja ku lingaho laza muze ni?’

Kaha Yehova ua tonesele Mbalame linga a mone kangelo. Ngeci kangelo ua handekele ngueni: ‘Yehova ua ku mamuine ngueni kati u ka singe vaIsaleli.’ Kaha Mbalame ua kumbuluile ngueni: ‘Nji na lingi mua ku pihia. Nji hiluka kuimbo.’ Vunoni kangelo ua mu lekele  ngueni: ‘Citava u ye ku Moave, vunoni u ka handeka lika vize via ku leka Yehova.’

Vuno Mbalame ua lilongeseleho vimo ni? Houe. Muomu mu nima yaco, Mbalame ua setekele ku singa vaIsaleli lutatu, vunoni Yehova ua mu lingisile ku va vezikisa lutatu luose. Mu nima ya ntsimbu, vaIsaleli va ku luisile Moave, ngeci Mbalame neni ua tsile ku ndzita yaco. Ci li ku lutue nga Mbalame ua halakanene kuli Yehova, ni vati?