Omo vaIsaleli va kele mu vindinda, Kola (Nkole), Ndatane, Avilame na vakuavo va ku pua 250 va alulukilile Mosesa. Va mu lekele nguavo: ‘Tu na hono ku tu pakesa! Vika u na lipuisila ntuamena uetu, kaha Alone sasendote ua kama? Yehova ali netu vose kati nove na Alone lika houe.’ Yehova ka ca mu ile ku mutima, muomu va alulukilile ikeye mpundu!

Mosesa ua lekele Kola na vantu veni ngueni: ‘Mene cimene, ku mu ka nona vitenga via tuhia na ku hakamo insensu kaha mu keza ku tavenakulu. Linga Yehova a solole iya ya na hangula.’

Lia mukuavo ku cimene, Kola hamo lika na vamala 250 va ile mu ku ka liuana na Mosesa ku tavenakulu. Va lipuisile ngue vasasendote na ku tsimika insensu. Kaha Yehova ua lekele Mosesa na Alone ngueni: ‘Litepenu na Kola na va vantu veni.’

Vutuhu Kola ua ile kuli Mosesa ku tavenakulu, Ndatane, Avilame na vusoko vuavo va vianene ku yako. Ngeci Yehova ua lekele vaIsaleli va tunde ku vimbalaka via Kola, Ndatane, na Avilame. Kaha va vaIsaleli va tundileko vuasi-vuasi. Vunoni Ndatane, Avilame na vusoko vuavo vemanene hambandza lia vimbalaka  viavo. Ngeci haze vene mavu a asamene na ku va mina! Kaha ku tavenakulu, tuhia tua sulukile muilu na ku tsimika Kola hamo lika na vakua ku mu kuasa 250.

Kaha Yehova ua lekele Mosesa ngueni: ‘Tambula milamu ku ntuamena ua nkala muyati na ku soneka mazina avo ha milamu. Vunoni ha mulamu ua muyati ua vaLevi sonekaho lizina lia Alone. Kaha u ka haka milamu yaco mu tavenakulu, kaha muntu u nji ka hangula, mulamu ueni u kema vintemo.’

Lia mukuavo, Mosesa ua ka ambatele milamu yose na ku i lekesa ku va ntuamena. Mulamu ua Alone uemine vintemo na ku tavula vintsani via ku hia. Eci ca muesele ngecize Yehova ua hanguile Alone ku pua sasendote ua kama.