Yehova ua lekele Mosesa ngueni: ‘Kanduka ku muncinda. Nji ka soneka masiko ange ha mavue na ku a hana kuli yove.’ Mosesa ua londele ku muncinda, kaha ua keleko matangua 40, mutana na vutsiki. Mu ntsimbu ya keleko, Yehova ua sonekele Masiko Likumi ha mavue avali na ku a hana kuli Mosesa.

Mu nima ya amo matangua, vaIsaleli va singaniekele nguavo Mosesa na va seza. Ngeci va lekele Alone nguavo: ‘Tu tonda muntu ueka a tu tuamenene. Tu pangele njambi!’ Kaha Alone ngueni: ‘Nji hienu olu yenu.’ Kaha ua i songonuene na ku panga cifua ca muana ngombe. Kaha vantu va handekele nguavo: ‘Ou ikeye Njambi uze ua tu tundisile mu Ingito!’ Ngeci va putukile ku lemesa muana ngombe ua olu na ku linga cilika. Vuno va lingile mua ku pihia ni? Eyo, muomu va lingile cikulaheso nguavo va ka lemesa lika Yehova. Vunoni va pokuele cikulaheso ci va lingile.

 Yehova ua muene vi va kele na ku linga, ngeci ua lekele Mosesa ngueni: ‘Sikuluka ku vantu. Vali na ku tsiha lisiko liange na ku lemesa njambi ua makuli.’ Kaha ua sikulukile ha muncinda oku na ambata vitale vivali.

Omo Mosesa ua kele na ku suena mu hiehi na cilombo, ua vuile vantu vali na ku imba. Kaha ua va muene vali na ku kina na ku tsikamena muana ngombe. Mosesa ua nienguele cikuma. Ngeci, ua mbilile ha mavu vitale vivali, kaha via tavukile. Haze vene ua nongesele uze muana ngombe. Kaha ua hulile Alone ngueni: ‘Vati u na ecelela vantu va ku lingise via cifua eci? Kaha Alone ngueni: ‘Kati u niengue. U tantekeya cifua ca vantu ava. Va na tondele njambi, ngeci nji na mbilile olu yavo mu tuhia, kaha ha na fumu ou muana ngombe!’ Via lingile Alone tele ka pandele ku vi linga. Ngeci Mosesa ua kandukile ku muncinda na ku ka lambelela Yehova linga ecele vantu ku vupi vu va lingile.

Yehova uecelele vaze va kele na cizango ca ku mu ononoka. Ua mono vika ca puililile ca seho kuli vaIsaleli ku kava ku tuamenena ca Mosesa ni?