Mu nima ya vingonde vivali, tele vaIsaleli va na tundu mu Ingito, va ka hetele ku Muncinda ua Sinayi na ku tungako cilombo. Yehova ua sanene Mosesa a kanduke ku muncinda, kaha ua mu lekele ngueni: ‘Nji novola vaIsaleli. Nga va nji ononoka na ku niunga masiko ange, nji ka va puisa vantu vange va ku lifuila.’ Kaha Mosesa ua sikulukile kuli vaIsaleli na ku va leka via mu lekele Yehova. Vati va kumbuluile? Nguavo: ‘Viose via na handeka Yehova tu ka vi linga.’

Kaha Mosesa ua kandukile naua ku muncinda. Ngeci Yehova ua mu lekele ngueni: ‘Nji handeka nove mu matangua atatu. Mamuna vantu linga kati va seteke ku kanduka ku Muncinda ua Sinayi, mu ntsimbu yaco.’ Ngeci mukemuo, Mosesa ua sikulukile na ku leka vaIsaleli va liviukisile mu ku halakana via ka va leka Yehova.

Kaha mu nima ya matangua atatu, vaIsaleli va muene mihiato na liselua lia ku hima ha muncinda. Kaha va vuile naua ku-zima ca kama na cikumo ca luneta. Kaha Yehova ua sulukile ha muncinda mu tuhia. VaIsaleli va vuile vuoma vua kama ngeci va putukile ku zaza. Muncinda uose ua zimanganene mu muisi, kaha uose ua zazele cikuma. Cikumo ca luneta ca tualeleleho ku livuezelela. Kaha Njambi ua handekele ngueni: ‘Ange nji Yehova. Kati mu ka lemese vanjambi veka.’

Mosesa ua kandukile lukuavo naua ku muncinda, kaha Yehova ua mu hele masiko a vati vantu va na pandele ku mu lemesa na ku yoya. Mosesa ua sonekele masiko aco, kaha ua ka a tandelele vaIsaleli. Ngeci va lingile cikulaheso nguavo: ‘Viose via na handeka Yehova tu ka vi linga.’ Ngue mu tu na mono, vaIsaleli va lingile cikulaheso kuli Yehova. Vuno va ci puisilemo ni?