Omo mu Isaleli mua kele ndzala, kaIsaleli ua lizina Naomi ua nungulukilile ku cifuti ca Moave hamo na yalieni na vana vavo vavali va vamala. Mu nima ya ntsimbu, yalieni ua tsile. Vana veni vavali va ambatele Lute na Olepa vaze va puile vakua Moave. Vunoni ca vusiua, mu nima ya ntsimbu vana vavali va vamala va Naomi navo va tsile.

Kaha omo Naomi ua vuile ngecize ndzala inahu mu Isaleli, ua hilukile kuimbo. Va Lute na Olepa va ile neni, vunoni omo va kele mu vungendzi, Naomi ua va lekele ngueni: ‘Mua puile vampuevo va cili ku vana vange, kaha mua puile vantu va cili kuli ange. Nji tonda ngecize mu ka somboke naua. Hilukenu kuimbo lienu ku Moave.’ Vunoni vakevo va mu kumbuluile nguavo: ‘Nietumueno tua ku lema cikuma! Ka tu tondo ku ku seza lika liove.’ Vunoni kasi Naomi ua tualeleleho ku va leka linga va hiluke kuimbo liavo. Ngeci mu nima ya ntsimbu, Olepa ua hilukile, vunoni Lute ua salele. Kaha Naomi ua lekele Lute ngueni: ‘Olepa ali na ku hiluka kuimbo lienu na ku vanjambi venu. Nove ya neni.’ Vunoni Lute ua mu kumbuluile ngueni: ‘Ka nji ka ku seza lika liove. Nji tonda vantu vove va pue vantu vange, na Njambi yove, ku pua Njambi yange.’ Vati ua vuile Naomi omo ua vuile mezi a Lute?

Va Lute na Naomi va hetele mu Isaleli tele vantu va putuka ku tia sevanda. Tangua limo, Lute ua ile na ku nonongola visupo via vimbuto muihia lia umo yala ua lizina Mboaze, muana ua Lahave. Mboaze ua vuile ngecize Lute ua puile kaMoave uze ua kele na lukakatela lua ngozi na Naomi. Ua lekele vangamba veni ku seza vimbuto vimo muihia linga Lute a ku nonongole.

 Ku vutsiki vuze vene, Naomi ua hulile Lute ngueni: ‘Ku lihia lieya u na ka pangela lelo?’ Kaha Lute ngueni: ‘Ku lihia lia yala ua lizina Mboaze.’ Kaha Naomi ua mu lekele ngueni: ‘Mboaze ua pua kavusoko ka yaliange. Tualelelaho ku panga mu lihia lieni hamo na vampuevo vakuenu. U ka uana vuvando kuze.’

Lute ua tualeleleho ku panga muhia lia Mboaze noho va manusuile ku tia. Mboaze ua muene ngecize Lute ua pangele cikuma, kaha ua puile mpuevo ua ku hia. Ku ntsimbu ize, nga yala na tsi, kaha ka semene, kavusoko keni na pande ku ambata ntuluue yeni. Ngeci mukemuo Mboaze ua ambatele Lute. Va semene muana u va lukile lizina Ovende, uze ua puile kuku ya Muangana Ndaviti. Va vusamba va Noami va viukilile cikuma neni. Va handekele nguavo: ‘Ha katete, Yehova ua ku hele nokomueno Lute, uze ua kele na ngozi ya kama kuli ove, kaha vuovuno uli na mutekulu. Yehova a pue ua ku sangaziala.’