Mu nima ya ku tuamenena vangamba va Njambi miaka ya yingi, Yehosua ua tsile na miaka 110. Mu miaka yose ya kele Yehosua na muono, vaIsaleli va lemesele Yehova. Vunoni, mu nima ya ku tsa ceni, va putukile ku lemesa tumponia ngue mu va kele na ku linga vakua Kanana. Mu ku linga vaIsaleli va likelele ku lemesa ca vusunga, Yehova ua tavesele umo muangana ua mu Kanana lizina lieni Yavine linga a va pakese. Ngeci vaIsaleli va vundilile Yehova a vohiele. Kaha Yehova ua va hele ntuamena ua muha lizina lieni, Mbalake, linga a va kuase ku hiluka kuli Yehova.

Kaha umo kapolofeto ua mpuevo, Ndevola, ua tambuile umo muzimbu kuli Yehova, ua pandele ku leka Mbalake. Ngeci mukemuo, ua tumine vantu va ka mu sane, kaha ua mu lekele ngueni: ‘Hangula vamala 10.000, linga u ka lue ndzita na civunga ca Yavine ku kandonga ka Kisone. Kukekuo ku u ka vulila Sisela ntuamena ua masualale va Yavine.’ Kaha Mbalake ua kumbuluile Ndevola ngueni: ‘Nji na tava kuya, vunoni noho nji ye nove.’ Kaha Ndevola ngueni: ‘Nja tava kuya nove. Vunoni tantekeya nguove kati yove u ka tsiha Sisela. Muomu Yehova ngueni Sisela va ka mu tsiha kuli umo mpuevo.’

Ndevola ua ile na Mbalake hamo lika na masualale veni ku Muncinda ua Tavole, va ka liviukisilile ku lua ndzita. Omo Sisela ua vuile muzimbu uaco, ua kunguluile matemba a ndzita na masualale veni mu cimbongo ca Muncinda ua Tavole. Kaha Ndevola ua lekele Mbalake ngueni: ‘Ha litangua lia lelo, Yehova a ku kuasa ku vula ndzita.’ Mu nima yaco, Mbalake na masualale veni 10.000 va sikumukile muncinda mu ku ka liuana na civunga ca ngolo ca masualele va Sisela.

Kaha Yehova ua lingisile ndonga ya Kisone ku zalela. Ngeci matemba a Sisela a tompelele mu mandova. Vunoni Sisela ua sulukile mu litemba lieni na ku tina ha mikono. Mbalake ua hasele ku vula civunga ca masualale va Sisela, vunoni ivene Sisela ua tinine! Mua tinine ua ka vandele mu mbalaka ya umo mpuevo ua lizina Yaele. Kaha Yaele ua mu zumbuile mavisi na ku mu hana lipayi a lifuike. Mu ku linga Sisela ua zeyele omo lia ndzita, ua ile mu tulo. Kaha Yaele ua mu yombele na ku mu tuva mbambo mu mutue, ngeci ua tsile.

Mbalake uezile mu ku tonda Sisela. Kaha Yaele ua tuhukile mu mbalaka yeni na ku mu leka ngueni: ‘Kovela, nji ku lekesa muntu i uli na ku tonda.’ Mbalake ua kovelele mu mbalaka na ku uana Sisela na tsi. Mu nima ya viose evi, Mbalake na Ndevola va putukile ku sangaziala Yehova na muaso omo lia ku kuasa vaIsaleli ku vula vitozi viavo. Kaha vaIsaleli va yoyele mu ciyulo miaka 40.