Mu nima ya ntsimbu, vaIsaleli va sile naua Yehova na ku lemesa vanjambi va makuli. Kaha mu miaka itanu na ivali, vaMindiane va pundile vimuna via vaIsaleli na ku pihisa vimbuto viavo. Kaha vaIsaleli va kele na ku vanda mu vimpako via mincinda mu ku tina vaMindiane. Ngeci va lambelele Yehova linga a vovole. Yehova ua tumine kangelo kuli umo mukuendze, lizina lieni Ngilione. Kangelo ua lekele Ngilione ngueni: ‘Yehova na ku hangula ku pua ntuamena ua masualale ua ngolo ya kama.’ Vunoni Ngilione ua mu hulile ngueni: ‘Vati nji ka hasa ku ovola Isaleli? Nji muntu ua ngoco.’

Vati Ngilione ue ku tantekeyele ngecize Yehova na mu hangula? Ua hakele maka a mpanga ha mavu na ku leka Yehova ngueni: ‘Nga, mene cimene maka a ka zula na mume vunoni livu li koma, kaha nji ka tantekeya ngecize nkuma u na nji hangula nji kovole Isaleli.’ Lia mukuavo cimene, maka a zulile vunoni livu kuahi! Vutuhu ngoco, Ngilione kasi ua vundilile ngueni, lia mukuavo livu li ka zule vunoni maka a kome. Omo via solokele ngecize vene, Ngilione ua kele honi na vusunga ngecize nkuma Yehova mpundu na mu hangula. Ngeci ua kunguluile masualale veni linga a luise vaMindiane.

 Yehova ua lekele Ngilione ngueni: ‘Nji ka lingisa vaIsaleli ku vula ndzita. Vunoni u li na masualale va vengi, halumo mu ka singanieka nguenu mu na vulu ndzita ku ngolo yenu vavene. Ngeci mukemuo, leka uose ali na vuoma a hiluke kuimbo.’ Kaha masualale 22.000 va hilukile kuimbo, kua lisupile 10.000. Vunoni Yehova ua lekele Ngilione naua ngueni: ‘Kasi kua lisupu masualale va vengi. Va tuale ku ndonga, kaha u ka va leka linga va ka nue mema. Kaha u ka hangulaho lika vaze va ka nua oku va na lavelela kulihi ku izilila vitozi.’ Vamala 300 lika va hasele ku lingamo. Yehova ua kulahesele ngueni na vaze vene masualale va vandende, a ka kuasa Isaleli ku vula masualale vaMindiane va ku pua 135.000.

Ku vutsiki vuze, Yehova ua lekele Ngilione ngueni: ‘I napuho ntsimbu ya ku luisa vaMindiane!’ Ngeci Ngilione ua hele masualale veni maluneta na vinjava via kama, mu kati ua suekelemo vimbundi via tuhia. Kaha ua va lekele ngueni: ‘Mu ka tala kuli ange, na ku linga muose mu nji ka linga.’ Ngilione ua sikile luneta lueni na ku tavula njava yeni, kaha ua huingile cimbundi ceni ca tuhia na ku handeka ngueni: ‘Mukuale ua Yehova na ua Ngilione!’ Kaha masualele veni vose va lingilemo. Ngeci vaMindiane va limuaniene na ku tina omo lia vuoma. Kaha omo lia liuayanga va putukile ku litsiha vakevo vavene. Yehova ua kuasele naua vaIsaleli ku vula vitozi vavo.