VaIsaleli va vengi va hilukile naua mu ku lemesa tumponia, ngeci Yehova uecelele vaFilisteo ku tuamenena cifuti cavo. Vunoni kua kele vamo vaIsaleli va lemene Yehova. Umo uavo ua puile Manoa. Ikeye na mpueyeni ka va kele na muana. Vunoni tangua limo Yehova ua tumine kangelo kuli mpuevo ya Manoa. Kaha kangelo ua mu lekele ngueni: ‘U ka sema muana ua yala. Ikeye a ka patula Isaleli ku vaFilisteo. A ka pua kaNazileu.’ Ua tantekeya veya va puile vaNazileu ni? Va puile vangamba va ku lifuila va Yehova. VaNazileu ka va va tavesele ku tehula vinkambu.

Mu nima ya ntsimbu Manoa ua kele na muana, kaha ua mu lukile Samusoni. Omo ua kele na ku kola, Yehova ua mu puisile mukua ngolo. Samusoni ua hasele ku tsiha ndumba na mavoko eni. Tangua limo, Samusoni ua tsihile vaFilisteo va ku pua 30 lika lieni. Vutsiki vumo tele Samusoni na kosa ku Ngaza, vaFilisteo va ile ku mbelo ya mbonge na ku mu vandamena linga va ka mu tsihe ku cimene. Vunoni mu kati ka vutsiki, Samusoni ua hindukile, kaha ua ile ku mbelo ya mbonge na ku pukula lipito ku civumbe. Kaha ua ambatele lipito ha citsili na ku londa nalio kuilu lia muncinda ua kele mu hiehi na Hevelone.

Mu nima ya ntsimbu, vaFilisteo va ile kuli Ndelila mpuevo ya lemene Samusoni, na ku mu leka nguavo: ‘Tu ku fueta makulukazi a vimbongo via palata nga u tantekeya ha kala ngolo ya Samusoni. Tu tonda ku mu kuata na ku mu haka mu kamenga.’ Mu ku linga Ndelila ua tondele vimbongo, ua va tavele. Ha katete Samusoni ua vianene ku mu leka kua kala ngolo yeni. Vunoni ua mu sindiyile noho ua mu lekele lihungu lieni. Ua mu lekele ngueni: ‘Vinkambu viange kanda va vi tehula lumo muomu nji kaNazileu. Nga va nji tehula vinkambu, ndzili yange i ka nji tunda.’ Samusoni ua sevukile mua kama mua mu lekele, ni vati?

 Kaha haze vene Ndelila ua lekele vaFilisteo ngueni: ‘Nja tantekeya lihungu lieni!’ Ua lingisile Samusoni ku kosa ha mikono yeni, kaha ua sanene umo yala a mu tehule vinkambu. Kaha Ndelila ua tambakanene ngueni: ‘Samusoni, vaFilisteo va neza!’ Samusoni ua niangumukile, vunoni ua vuile ngecize ngolo yeni i na mu tundu. Ngeci vaFilisteo va mu kuatele na ku mu tuva meso, kaha va mu hakele mu kamenga

Tangua limo makulukazi a vaFilisteo va likunguluilile mu tembele ya njambi yavo Ndangone, na ku tambakana nguavo: ‘Njambi yetu na tu kundika Samusoni! Mu tuhulenu hambandza, linga tu hehe neni.’ Kaha va mu tuhuile na ku mu imika ha kati ka vingundzi vivali, na ku mu pakesa. Kaha Samusoni ua tambekele ngueni: ‘A, Yehova, sukulukambu nji haneko naua ngolo lumo lika.’ Ku ntsimbu ize tele vinkambu vieni vi na kolo. Kaha ua sindikile vingundzi vivali na ngolo yeni yose. Ngeci ndzivo yose ya lundumukile na ku tsiha vantu vose va kele mu tembele, kaha na Samusoni neni ua tsile.