VaIsaleli va sile naua Yehova na ku putuka ku lemesa vanjambi va makuli. Omo vakua Amone va luisile vaIsaleli, vaze vanjambi ka va lingile na vimo viahi mu ku va kuasa. VaIsaleli va va yandesele miaka ya ingi. Ngeci mukemuo, va handekele kuli Yehova nguavo: ‘Tua vulumuna. Sukulukambu tu ohiele ku vitozi vetu.’ Kaha haze vene, vaIsaleli va nongesele vanjambi va tumponia na ku putuka ku lemesa naua Yehova. Yehova ka tondele ku va mona va tualelelaho ku yanda.

Lisualale ua ngolo ya kama ua lizina Yefeta va mu hanguile ku tuamenena vantu ku lua ndzita na vakua Amone. Ua lekele Yehova ngueni: ‘Nga u tu kuasa ku vula ndzita, nja ku kulahesa, mu nji ka hiluka kuimbo, nja ku ku hana muntu ua katete a ka tuhuka ku  ndzivo yange mu ku liuana nange.’ Yehova ua halakanene civundilo ca Yefeta na ku mu kuasa ku vula ndzita.

Omo Yefeta ua hilukile kuimbo, muntu ua katete ku tuhuka kua ku liuana neni ua puile muaneni umo lika ua mpuevo. Ua kele na ku kina na ku sika tungoma. Vati Yefeta ua lingile? Ua vulukile cikulaheso ceni na ku handeka ngueni: ‘Nani, muanange! U na pokola mutima uange. Nja lingile cikulaheso kuli Yehova. Linga nji ci puisemo, nja pande ku ku tuma u ka pangele ku tavenakulu ku Silo.’ Kaha muaneni ua mu lekele ngueni: ‘Tata, nga u na lingi cikulaheso kuli Yehova, ua pande ku ci puisamo. Nji tonda lika u nji tave vingonde vivali nji ka kale hamo na vavusamba vange va vampuevo ku mincinda. Kaha nja ku ya.’ Muana Yefeta ua pangelele Yehova na lukakatela ku tavenakulu muono ueni uose. Nkala muaka, vavusamba veni va kele na ku ya ku Silo mu ku ka mu meneka.