Mizimbu ya ku nonga ca Yeliko ya lisanduokele ku vifuti vikuavo mu Kanana. Ngeci vamiangana vaco va likunguluile linga va luise vaIsaleli. Vunoni Vakua Ngiveone va kuatele mana eka. Ngeci va ile kuli Yehosua, oku va na zala vizalo via ku huila, kaha va mu lekele nguavo: ‘Tu na tundu ku cifuti ca ku lahako. Tu nevu via Yehova na viose via mi lingilile ku Ingito na ku Moave. Tu kulahesenu ngecize ka mu ka tu luisa, kaha tu pua vangamba venu.’

Yehosua ua tavele na ku likuminia ngueni ka va ka va luisa. Mu nima ya matangua atatu, ua tantekeyele ngecize kati va ku laako. Nkuma navo va puile vakua Kanana. Yehosua ua va hulile ngueni: ‘Vika mu na tu ongelele?’ Va kumbuluile nguavo: ‘Tua vuile vuoma! Tua tantekeya ngecize Yehova Njambi yenu ali na ku mi luila. Sukulukambu kati mu tu tsihe.’ Yehosua ua niungile via likuminyine ngeci ka va tsihile.

Ka mua hitile ntsimbu ya kama, vamiangana vatanu va mu Kanana na masualale vavo va zuzuisile vakua Ngiveone. Ngeci  mukemuo, Yehosua na masualale veni va cauile vutsiki vuose linga va ka vovole. Ndzita ya putukile lia mukuavo cimenemene. Vakua Kanana va limuaniene na ku tina. Vunoni kuose ku va tininine Yehova ua va nokeselele mavue a kama. Kaha Yehosua ua vundilile Yehova emike litangua. Omo lia vika? Muomu ua tsilielele cikuma muli Yehova. Cili vene, litangua ka lia lahukile mu litangua lia mutuntu, noho vaIsaleli va vulile vamiangana va mu Kanana na masualale vavo.