Yehova ua lekele Samuele ngueni: ‘Ya ku ndzivo ya Njese. Umo ua vana veni ikeye a ka pua muangana ua Isaleli.’ Kaha Samuele ua ile ku ndzivo ya Njese. Omo ua muene muana Njese ua mukuluntu, ua singaniekele ngueni: ‘Na pande ku pua ou vene.’ Vunoni Yehova ua lekele Samuele ngueni ou kati ikeye. Kaha Yehova ngueni: ‘Nje ku tala vi li mu mutima ua muntu, kati lika cihanga ceni.’

Njese ua nehele vana veni va ku pua 6 kuli Samuele. Vunoni Samuele ngueni: ‘Yehova ka hanguile na umo uahi ha kati kavo. Uli na vana vakuavo ni?’ Kaha Njese ngueni: ‘Ku na sala umo lika, ua yala ua kanikeho, Ndaviti. Ali na ku niunga vampanga vange.’ Omo Ndaviti uezile, Yehova ua lekele Samuele ngueni: ‘Ikeye ou!’ Kaha Samuele ua hakele Ndaviti mazi ha mutue, kaha ua mu vuavesele ku ka pua muangana ua Isaleli ku lutue.

Mu nima ya ntsimbu, vaIsaleli va luile ndzita na vaFilisteo, vaze va kele na lisualale ua ku hiana ku ndzili, ua lizina Ngoliata mu ku va luila. Tangua ku tangua ua sahuile vaIsaleli. Ua tambekele ngueni: ‘Nji tumenu yala a ku lue nange. Nga a nji vula, tu ka pua vandungo venu. Vunoni nga nji mu vula, mu ka pua vandungo vetu.’

Kaha Ndaviti ua ile ku cilombo ca masualale vaIsaleli mu ku tuala via-ku-lia ku vamuanaye va puile masualele. Ua vuile lizi lia Ngoliata, kaha ngueni: ‘Nji ka lua neni!’ Vunoni Muangana Saulu ua mu lekele ngueni: ‘U ci li u kanike.’ Kaha Ndaviti ngueni: ‘Yehova a ka nji kuasa.’

 Saulu ua tondele ku hana Ndaviti cikovelo ceni ca vikungu, vunoni Ndaviti ngueni: ‘Ka nji hasa ku lua naco.’ Kaha Ndaviti ua tambuile fisika yeni na ku ya ku ndonga. Ua ka hanguile mavue atanu a cili na ku a haka mu njato yeni. Kaha ua tuntilile ku talekesa kuli Ngoliata. Kaha Ngoliata ua tambekele ngueni: ‘Tuaya kuli ange kanike. Nji ka ku hia ku tuzila na tusitu va ku musenge.’ Vunoni Ndaviti ka vuile vuoma. Kaha ua tambekeleko ngueni: ‘Ove u li na ku iza kuli ange na mukuale na likunga, vunoni ange nji iza kuli ove mu lizina lia Yehova. Kaha kati netu uli na ku lua; vunoni uli na ku lua na Njambi. Vose vali hano va ka mona ngecize Yehova ua hiana ngolo ku tuvakana mukuale ni likunga. Mu vose a ka mi kundika mu livoko lietu.’

Kaha Ndaviti ua hakele livue mu fisika yeni na ku i huinga na ndzili yeni yose. Na vukuasi vua Yehova, livue lia tundilemo na ku ka kovela mu luholo lua Ngoliata. Ngoliata ua uililile ha mavu. Kaha Ndaviti ua tuntilileko na ku mu manusula na mukuale ueni ivene. Omo vaFilisteo va muene ngecize Ngoliata na tsi va tinine. Nove ua tsiliela muli Yehova ngeci mua Ndaviti ni?