Ha vuangana vua miyati likumi vua Isaleli ha hitile vamiangana va vapi va vengi, vunoni Ahave ua puile ua mupi ku hiana vamiangana vose va katete. Kaha ua ambatele mpuevo ua vilinga via ku pihia, mukua ku lemesa Mbale. Lizina lieni Yezevele. Ahave na mpueyeni Yezevele va sulisile cifuti na ku lemesa ca Mbale kaha va tsihile vapolofeto va Yehova. Vati ua lingile Yehova? Ua tumine Eliya a tuale muzimbu kuli Ahave.

Eliya ua ka lekele Muangana Ahave ngueni omo lia vupi vueni, mu Isaleli ka mu ka noka niondzi. Ngeci vimbuto ka via sokele mu miaka itatu na mutamba, kaha mu cifuti mua hitile ndzala ya kama. Yehova ua tumine Eliya a hilukile naua kuli Ahave. Mua ka heteleko, muangana ua handekele ngueni: ‘U mukua lisino! Yove uli na ku koka viose evi!’ Eliya ua kumbuluile ngueni: ‘Muangana, kati yange nja lingisa niondzi ku likela ku noka. Vunoni yove u na lingimo mu ku lemesa Mbale. Tu ka linga ceseko. Kungulula cifuti cose na vapolofeto va Mbale ku muncinda ua Kalemele.’

Ngeci vantu va likunguluile ha muncinda uaco. Kaha Eliya ngueni: ‘Mua pande ku hangula. Nga Yehova ikeye Njambi ua vusunga, mu kavenu. Nga Mbale, mu kavenu. Nji tonda tu linge ceseko. Vapolofeto 450 va Mbale va viukise cikombelo na ku vundila kuli njambi yavo, nange nji viukisa cange na ku vundila kuli Yehova. Uose a kumbulula na tuhia ikeye Njambi ua vusunga.’ Ngeci vantu va tavele.

Vapolofeto va Mbale va viukisile cikombelo cavo. Kaha va vundilile litangua liose kuli njambi yavo nguavo: ‘A Mbale, tu kumbulule!’ Vunoni mbale ka kumbuluile, ngeci Eliya ua va tsopele. Ngueni: ‘Tambakanenu na ngolo yenu yose. Halumo njambi yenu na kosa, kaha a tondeka ku mu hindula.’ Litangua lia putukile ku toka kaha vapolofeto va Mbale va tualeleho ku tambeka. Vunoni kasi uahi ua va kumbuluile.

Kaha Eliya ua hakele cikombelo ceni ha mutula na ku itilaho mema hose. Mu nima yaco ua vundilile ngueni: ‘A Yehova, sukulukambu muesa vantu va tantekeye ngecize yove Njambi ua vusunga.’ Ha ntsimbu ize vene, Yehova ua tumine tuhia ku tunda muilu kaha tua tsimikile cikombelo. Kaha vantu va tambekele nguavo: ‘Yehova ikeye Njambi ua vusunga!’ Vunoni  Eliya ua handekele ngueni: ‘Kati mu ecele vapolofeto va Mbale va tine!’ Ngeci ha litangua lize va tsihile vapolofeto 450 va Mbale.

Kaha citania ca huile, muomu ku kalunga ndonga kua solokele kaliselua. Kaha Eliya ua lekele Ahave ngueni: ‘Niondzi i na hete. Viukisa litemba liove kaha hiluka kuimbo.’ Mu nima yaco, kuilu kua lavele na maselua, kua hitile luhundzi, kaha niondzi ya kama ya putukile ku noka. Mu ku hiluka ku mbonge, Ahave ua tuntisile litemba lieni cikumakuma. Vunoni Yehova ua kuasele Eliya ku mu tuvakana vutuhu ua tuntile ha mikono. Vuno visoti via Eliya via huile ni? Tu tale mu cilongesa ci na hatako.