Yezevele ua vuile via lingikile ku vapolofeto va Mbale, ngeci ua nienguele cikuma. Kaha ua tumine muzimbu kuli Eliya ngueni: ‘Mene, nove u ka tsa ngue vapolofeto va Mbale.’ Eliya ua vuile vuoma ua tinina mu ndinda. Ua vundilile ngueni: ‘Yehova, nja hono honi. Nji tave, nji tse.’ Omo lia ku zeya, Eliya ua kosele muintsi lia muti.

Kaha umo kangelo ua mu hinduile na ku mu leka ngueni: ‘Hinduka linga u lie.’ Mua hindukile ua muene mbolo ya ku oca ha mavue a tuhia na njava ya mema ku mukulo. Ngeci ua lile na ku nua mema, kaha ua kosele naua. Vunoni kangelo ua ku mu hinduile naua na ku mu leka ngueni: ‘Lia. Linga u kale na ndzili mu vungendzi vuove.’ Ngeci Eliya ua lile naua. Kaha uendele matangua 40 na matsiki 40 noho ua ka hetele ku Muncinda ua Holeve. Mua heteleko, ua kovelele mu mpako ya muncinda a kose. Kaha Yehova ua mu hulile ngueni: ‘Vika u linga kuno, Eliya?’ Eliya ua kumbuluile ngueni: ‘VaIsaleli va na pokola litavasiano liavo kuli ove. Kaha va na uisa mitula na ku tsiha vapolofeto vove. Nange vali na ku nji tonda linga va nji tsihe.’

Yehova ua mu lekele ngueni: ‘Kanduka u kemane helu lia muncinda.’ Ha katete, kua hitile luhundzi lua kama. Kaha kua hitile lindunduma na tuhia. Mu nima yaco, Eliya ua vuile lizi lia ku lembama. Ngeci ua lifuikile ku cihanga na cikovelo ceni na ku tuhuka mu mpako. Kaha Yehova ua mu hulile vika ua kele na ku tina. Eliya ua kumbuluile ngueni: ‘Yange lika nji na lisupuko.’ Vunoni Yehova ngueni: ‘Kati yove lika. Mu Isaleli kasi muli vakuenu 7.000 ve ku nji lemesa. Ya, u ka puise Elisa kapolofeto muomu ikeye a ka ku hinga.’ Haze vene, Eliya ua ka lingile via mu tumine Yehova. Mu ku mona cove, nove Yehova a hasa ku kuasa nga u linga via ku tuma ni? Eyo, a ka ku kuasa. Ntsimbu kanda tu tantekeye via lingile Eliya, tu ci tale vimo via solokele mu ntsimbu i kua hitile citania.