Mu nima ya Solomone ku pua muangana ua Isaleli, Yehova ua mu hulile ngueni: ‘Vika u tonda linga nji ku hievio?’ Kaha Solomone ngueni: ‘Ange nji ci li nji kanike, kaha ka nji tantekeya vi nji li na ku linga. Sukulukambu nji hie mana linga nji niunge vuino vantu vove.’ Kaha Yehova ngueni: ‘Muomu u na vundila mana kati vupite, nji ka ku puisa mukua mana ku hiana vose ha mavu. Nji ka ku hia vupite naua. Kaha nga u nji ononoka, u ka yoya miaka ya ingi.’

Solomone ua putukile ku tunga tembele. Ua pangesele olu ya cili, palata, mavaya na mavue. Makulukazi a vamala na vampuevo va vutongue va pangele ku tembele. Mu nima ya miaka 7, tembele ya huile, kaha ya puileho ntsimbu ya ku i kundika kuli Yehova. Ya kele na mutula, kaha ha kele vikombelo. Solomone ua tsikamene ku lutue lua mutula na ku vundila ngueni: ‘A, Yehova, ino tembele kati ya kama cikuma ni ya cili cikuma kuli ove, vunoni sukulukambu tava ku lemesa cetu na ku halakana vivundilo vietu.’ Vati Yehova ua singaniekele ku tuala ha tembele na civundilo ca Solomone? Omo Solomone ua manusuile ku vundila, tuhia tua tundile muilu na ku tsimika vikombelo ha mutula. Eci ca muesele ngecize Yehova ua tavele tembele. Kaha omo vaIsaleli va muene evi, va viukililile.

Muangana Solomone va mu tantekeyele omo lia mana mu Isaleli yose na vihela via ku laako. Vantu va kele na ku ya kuli Solomone mu ku va kuasa ku visoti viavo. Cipue muangana ua mpuevo ua ku Seva uezile mu ku eseka Solomone na vihula via ku kaluua. Kaha omo ua vuile vikumbululo vieni, ua handekele ngueni: ‘Ha katete, ka nja tavele vi va nji lekele vantu ku tuala hali ove, vunoni nja mono ngecize ua hiana mana ku tuvakana vi va nji lekele. Njambi yove, Yehova, na ku vezikisa.’ Mua vusunga, vantu va yoyele mua cili mu cifuti ca Isaleli kaha va viukililile cikuma. Vunoni ntsimbu ya kele ku hiehi linga viuma vi aluluke.