Omo Solomone ua kele na ku lemesa Yehova, mu Isaleli mua kele ciyulo. Vunoni Solomone ua ambatele vampuevo vavengi va ku vifuti vikuavo, kaha vampuevo vaco va kele na ku lemesa tumponia. Kavundende kavundende, Solomone ua putukile ku aluluka na ku putuka ku lemesa tumponia. Yehova ua tenukile cikuma. Ngeci ua lekele Solomone ngueni: ‘Nji ka tambula Isaleli ku vusoko vuove na ku i tepa ha vali. Nji ka hana mutamba ua kama ku vangamba vove, kaha vusoko vuove vu ka sika mutamba ua undende.’

Yehova ua soluele vutumbe vueni mu njila ikuavo naua. Umo ua vangamba va Solomone, Yelovoame ua kele na ku ya vungendzi kaha ua liuanene na kapolofeto Ahiya. Ahiya ua tavuile cikovelo ceni mu mitamba 12 kaha ua lekele Yelovoame ngueni: ‘Yehova a ka tambula vuangana vua Isaleli ku vusoko vua Solomone na ku vu tepa ha vali. Tambula eyi mitamba muomu yove u ka pua muangana ua miyati likumi.’ Omo muangana Solomone ua vi vuile ua tondele ku tsiha Yelovoame! Kaha Yelovoame ua tininine ku Ingito. Mu nima ya ntsimbu, Solomone ua tsile, kaha muaneni Lehovoame ua puile muangana.

 Vakuluntu va mu Isaleli va lekele Lehovoame nguavo: ‘Nga u niunga vuino vantu, va ka ku ononoka.’ Vunoni vavusamba veni va vakuendze va mu lekele nguavo: ‘Pakesa vantu! Kaha va fuitise na vipanga!’ Lehovoame ua kavele vimamuna via vavusamba veni. Ua puile cikenia, kaha vantu va muendele vungungu. Va puisile Yelovoame muangana ua miyati likumi, kaha va vu lukile nguavo vuangana vua Isaleli. Miyati ikuavo ivali va i lukile nguavo vuangana vua Yunda, kaha va kele na lukakatela kuli Lehovoame. Miyati 12 ya mu Isaleli ya litepele.

Yelovoame ka tondele vantu veni va ka lemesele ku Yelusalema, muomu ya kele mu vuangana vua Lehovoame. Ua tantekeya omo lia vika? Yelovoame ua kele na vuoma ngecize va ka mu enda vungungu, kaha va ka kuasa Lehovoame. Ngeci ua pangele vana va vangombe vavali va olu na ku leka vantu veni ngueni: ‘Ku Yelusalema ku laako cikuma. Citava mu lemesele kuno vene.’ Kaha vantu va putukile ku lemesa vana va vangombe va olu na ku suva naua Yehova.