Vuangana vua Asilia vua tambuile vuangana vua Isaleli vua miyati likumi. Ngeci Senakelive, muangana ua Asilia ua tondele ku suana miyati ivali ya vuangana vua Yunda. Ua putukile ku tambula vimbonge imo ku imo. Vunoni mbonge ya tondele cikuma ya puile Yelusalema. Vunoni ka tantekeyele ngecize Yehova ua kele na ku ohiela Yelusalema.

Hezekiya, muangana ua Yunda, ua fuetele Senakelive vimbongo via vingi linga kati a luise Yelusalema. Vutuhu Senakelive ua tambuile vimbongo viaco, kasi ua tumine civunga ceni ca masualale va ngolo ku luisa Yelusalema. Ngeci vantu mu mbonge va vuile vuoma vua kama, muomu vakua Asilia va kele na ku suena mu hiehi na mbonge. Vunoni Hezekiya ua va lekele ngueni: ‘Kati mu ivue vuoma. Vutuhu vakua Asilia vali na ngolo, vunoni Yehova a ka tu hana ngolo ku hiana vakevo.’

Kaha Senakelive ua tumine kanganda keni, Lambesake ku Yelusalema mu ku zuzuisa vantu. Lambesake uemanene ku mbandza ya mbonge na ku tambakana ngueni: ‘Yehova ka ka mi kuasa. Kati mu tave Hezekiya a mi kuise. Ka kuesi njambi a hasa ku mi ohiela kuli etu.’

Kaha Hezekiya ua vundilile kuli Yehova a mu leke vati a linga. Yehova ua kumbuluile ngueni: ‘Kati u ivue vuoma vua mezi a Lambesake. Senakelive ka tambula Yelusalema.’ Mu nima yaco, Hezekiya ua tambuile mikanda ya tundile kuli Senakelive. Mu mikanda yaco va sonekelemo, nguavo: ‘Likelenu lika. Yehova ka hasa ku mi ohiela.’ Ngeci Hezekiya ua vundilile ngueni: ‘Yehova, sukulukambu, tu ohiele, linga vose va tantekeye ngecize yove lika u Njambi ua vusunga.’ Kaha Yehova ua mu lekele ngueni: ‘Muangana ua Asilia, ka keza mu Yelusalema. Muomu nji ka i niunga mbonge yange.’

Senakelive ua muene ngue vuovuno Yelusalema i pua yeni. Vunoni ku vutsiki vumo, Yehova ua tumine kangelo ueni ku mbandza ya mbonge, ku va kele masualale va  Senakelive. Kaha kangelo ua tsihile masualale va ku pua 185.000! Masualale va ngolo va Muangana Senakelive vose va tsile. Ngeci ka hasele ku linga na mumo mueka muahi, ua hilukile lika kuimbo. Yehova uohielele Hezekiya na Yelusalema, ngue mua kulahesele. Nga nove ua kele mu Yelusalema, nga ua kulahelele muli Yehova ni?