Mbene-handande muangana ua Silia, ua tualeleleho ku iza-iza mu ku luisa Isaleli. Vunoni Elisa ua kele na ku mamuna muangana ua Isaleli, ngeci ua hasele ku sevunuka ntsimbu yose. Mua vi tantekeyele, Mbene-handande ua tondele ku kuata Elisa. Kaha va mu lekele nguavo Elisa ali mu mbonge ya Ndotane, ngeci ua tumine Masualale va ku Silia va ka mu kuate.

Masualale va ku Silia vezile ku Ndotane ku vutsiki. Lia mukuavo cimene, ngamba ya Elisa mua tuhukile mu ndzivo, ua muene ngecize mbonge va na i zengeleka ku civunga ca masualale. Ua vuile vuoma ngeci ua tambakanene ngueni: ‘Elisa, vati tu linga?’ Elisa ua mu kumbuluile ngueni: ‘Vaze va li netu va vengi ku hiana vaze va li navo.’ Ha ntsimbu ize vene, Yehova ua lingisile ngamba ya Elisa a mone ngecize ku mincinda yose ya zengelekele mbonge kua sulile tuvalu va tuhia na matemba a ndzita.

Omo masualale va ku Silia va setekele ku mu kuata, Elisa ua vundilile ngueni: ‘Yehova, sukulukambu va puputiyise meso.’ Ha ntsimbu ize vene, masualale vutuhu va kele na ku mona, ka va tantekeyele kuiko va kele. Ngeci Elisa ua va lekele ngueni: ‘Ino  mbonge i mu neza kati ikeyo. Nji kavenu nji mi tuale ku muntu u muli na ku tonda.’ Kaha masualale va mu kavele na ku Samaliya, kua kele muangana ua Isaleli.

Mu va nongonuene kuiko va kele, tele va na va kuata laza kuli muangana ua Isaleli. Ngeci muangana ua hulile Elisa ngueni: ‘Citava nji va tsihe?’ Vuno Elisa ua pangesele ovu vukovelelo mu ku lifueta vi va tondele ku mu linga vaze masualale ni? Houe. Ua lekele muangana ngueni: ‘Kati u va tsihe. Va hane via-ku-lia na ku va tuma kuimbo liavo.’ Ngeci muangana ua va viukisilile na ku va hana via-ku-lia via vingi, mu nima yaco ua va tumine kuimbo liavo.