Yosiya ua puile muangana ua Yunda tele ali na miaka itanu na ivali. Ku matangua aze, vantu va kele na ku linga mahesi na ku lemesa tumponia. Omo Yosiya ua puisile miaka 16, ua setekele ku lilongesa ku lemesa Yehova mu njila ya cili. Mua puisile miaka 20, ua putukile ku nongesa tumponia na mitula ya ku lemesa ca makuli mu cifuti cose. Kaha mua puisile miaka 26, ua viukisile vantu linga va lelese tembele ya Yehova.

Ku tembele, sasendote ua kama, Hilikiya ua uanene lizengununo lia Masiko a Yehova—citava lizengununo liaco lize vene lia sonekele Mosesa. Safane, mukua ku soneka ua muangana, ua tualele lizengununo liaco kuli Yosiya kaha na ku mu tandelamo na lizi lia kama. Omo ua kele na ku halakana, Muangana Yosiya ua muene ngecize nkuma vantu va suile laza ku pokola masiko a Yehova. Kaha Muangana Yosiya ua lekele Hilikiya ngueni: ‘Mua vusunga Yehova na tenuka cikuma netu. Ya u ka handeke neni. Linga a tu leke vi tua pande ku linga.’ Kaha Yehova ua kumbuluile ku hitila muli kapolofeto ua mpuevo Hulunda, ngueni: ‘Vakua Yunda va na likela ku nji pangela. Tangua nji ka va hana kasitiku, vunoni kati kuno ku ntsimbu ya ku sika ca Yosiya, muomu na likehesa.’

Omo Muangana Yosiya ua vuile ou muzimbu, ua ile ku tembele na ku kungulula vantu va mu Yunda. Kaha ua va tandelele vose Masiko a Yehova na lizi lia kama. Mu nima yaco, Yosiya na vantu va likuminyine ku ononoka Yehova na mitima yavo yose.

 Cifuti ca Yunda ka ca lingile cilika ca Pasovala mu miaka ya yingi. Vunoni omo Yosiya ua tandele mu Masiko ngecize Pasovala ya pandele ku i linga muaka ku muaka, ua lekele cifuti cose, ngueni: ‘Tu ka linga cilika ca Pasovala kuli Yehova.’ Kaha Yosiya ua liviukisilile mu ku linga vikombelo via vingi na ku viukisa civunga ca vakua ku imba miaso ku tembele. Kaha cifuti cose ca lingile Pasovala na Ciuano ca Mbolo ka Yesi na Cimbaluila mu matangua atanu na avali. Ka kua hitile Pasovala yeka ya ku lifua na ize i va lingile, tunde ku matangua a Samuele. Mua vusunga Yosiya ua lemene mpundu Njambi. Nove ua lema ku lilongesa via Yehova ni?