Mu cifuti ca Silia mua kele umo kanike ua mpuevo ua kaIsaleli, ua kele ku laako na kuimbo liavo. Masualale va Silia va ka mu kuatele ku ndzivo ya visemi veni, kaha ua puile ndungo ya mpuevo ya kapitau ua civunga ca masualale ua lizina Namane. Uze kanike ua mpuevo ua lemesele Yehova, vutuhu ua yoyelele ha kati ka vantu ka va lemesele Yehova.

Namane ua kele na vuvezi vua ku pihia cikuma, kaha ntsimbu yose ua vuile ku vavala ca kama. Kaha uze kanike ua mpuevo ua tondele ku mu kuasa. Ngeci ua lekele mpuevo ya Namane ngueni: ‘Nji tantekeya umo yala a hasa ku kuasa yalienu. Mu Isaleli mua kala kapolofeto ua Yehova ua lizina Elisa. A hasa ku kanguisa yalienu.’

Kaha mpuevo ua ka lekele yalieni Namane via mu lekele uze kanike ua mpuevo. Namane ua kele na cizango ca ku seteka nkala ku saka, ngeci ua ile ku ndzivo ya Elisa ku Isaleli. Namane ua lavelele ku mu tambula na seho ya kama. Vunoni Elisa kezileko mu ku handeka neni mpundu, ua lingile ku tuma ngamba yeni a ka meneke Namane  na ku mu leka ngueni: ‘Ya, u ka tane mu ndonga ya Yondau vintsimbu vitanu na vivali. Kaha u ka kanguka.’

Namane ua livuile ku pihia cikuma mu va mu lekele ngoco. Ua handekele ngueni: ‘Nja singaniekele nguange ou kapolofeto a nji kanguisa mu ku vundila kuli Njambi yeni na ku nji saleka mavoko eni. Nkuma yange ya leka ku ka tana mu ndonga ya kuno ku Isaleli? Etu tua kala na vindonga via cili mu Silia. Ca cili nga nji na ile ku vindonga vietu!’ Namane ua nienguele cikuma na ku tunda ha ndzivo ya Elisa.

Kaha vangamba va Namane va mu kuasele ku singaniekaho vuino. Va mu lekele nguavo: ‘Kati u na likuminia ku linga nkala viuma linga u kanguke ni? Viuma via na ku leka kapolofeto kati via vikalu ku vi linga. Vika ka u vi lingila?’ Ngeci Namane ua tavele vi va mu lekele. Kaha ua ile ku ndonga ya Yondau na ku tanamo vintsimbu vitanu na vivali. Mua tanenemo lua mu citanu na luvali, Namane ua kangukile muvila uose. Ua vuile ndzolela ya kama, ngeci ua hilukile mu ku santsela Elisa. Ua ka mu lekele ngueni: ‘Vuovuno nja tantekeya ngecize Yehova ikeye Njambi ua vusunga.’ Mu ku singanieka cove, vati ua vuile uze kanike ua mpuevo ua kaIsaleli omo ua muene Namane va na ka mu kanguisa?