CILONGESA 6
Ku Lavelela Cika ca Kalako ku Tuala ha Vatsi?
1. Muzimbu uka ua cili ku tuala ha vatsi?
Yesu mua ka hetele ku Mbetaniya mu hiehi na Yelusalema, mua hitile matangua a uana fume ha tsililile kavusamba keni Lazalu. Kaha Yesu ua ile ku cihilo na Maliya na Mata vandumbu va mukua ku-tsa. Kaha mbunga ya vantu vali kunguluile mu kua ku tala. Aci singanieke ndzolela i va vuile Maliya na Mata omo va muene Yesu a sangula Lazalu.—Tandenu Yoano 11:21-24, 38-44.
Mata ua tantekeyele laza muzimbu ua cili ua ku sanguka ca vatsi. Ua tantekeyele ngueni Yehova aka sangula vatsi linga va ka yoye naua ha mavu.—Tandenu Yombi 14:14, 15.
2. Vatsi vali mu cifua cika?
Njambi ua lekele Andama ngueni: “Muomu u na pu mpumputa na ku mpumputa u ka hiluka.”—NJENISISI 3:19.
Vantu va va tanga na mpumputa. (Njenisisi 2:7; 3:19) Ka tua puile vimbembesi vie ku yoyela mu mivila ya ntsitu. Tua pua tu vantu va ntsitu na maninga, ka tua kele na cimo ceku ku-ovoka ha litangua lia ku-tsa. Capua vusunga muomu mu tue ku-tsa vuongo vuetu navuo vue ku-tsa kaha visinganieka vietu vieku nonga. Lazalu ka ambuluile na vimo viahi omo ua tsile muomu vatsi kava tantekeya na vimo viahi.—Tandenu Visamo 146:4; Ekelesiaste 9:5, 6, 10.
Vuno Njambi ue ku uemeka vantu mu tuhia mu nima ya ku-tsa ni? Houe! Mbimbiliya ya handeka nguayo vatsi ka va tantekeya na vimo viahi, cilongesa ca ku uema mu Ngehena capua ca visaki kaha ce ku sahula Njambi. Cisinganieka ca ku uemeka vantu Njambi ua ci zinda.—Tandenu Yelemiya 7:31.
Talenu video Vatsi va li mu Cifua Cika?
3. Vatsi va hasa ku handeka netu ni?
Vatsi kava hasa ku handeka cipue ku-ivua. (Visamo 115:17) Kuli vamo tungelo vapua vitozi vietu vakevo ve ku handeka ngue vantu vaze va-tsa laza linga vonge vantu. (2 Petulu 2:4) Ngeci mukemuo Yehova ua tu vindika ku seteka ku handeka na va-tsi.—Tandenu Ndeutelonomi 18:10, 11.
4. Iya vaka sangula?
Makulukazi a vantu vaze va tsa va ka sanguka na ku yoya ha mavu.Vaze lingile vuhenge muomu kava tantekeyele Njambi navo va ka sanguka.—Tandenu Luka 23:43; Vilinga 24:15.
Vose vaze va ka sanguka vaka lilongesa via Njambi na ku muesa lutsilielo muli Yesu mu ku mu-ononoka. (Kusolola 20:11-13) Vaze va ka sanguka na ku panga viuma via cili va ka yoya mu ndzolela na muono ka ue ku hua ha mavu.—Tandenu Yoano 5:28, 29.
5. Ku-sanguka ca vatsi ci tu longesa vika hali Yehova?
Njambi ua tu hana kulavelela ca vatsi mu ku tuma muaneni kua ku tu- tsila. Ku sanguka ca vatsi ci tu longesa via vingi ku tuala ha cilemo ca Yehova na vuana vua kavumbi keni. Iya u tonda ku ka mona omo vatsi va ka sanguka?—Tandenu Yoano 3:16; Loma 6:23.
