Yehova ua tu tuvakana ku mana. Ngue cisemi ua cilemo, Yehova ue ku tu lela. Cikuavo, te ka tondele tu li tuamenene etu vavene. (Yelemiya 10:23) Ngeci mua vanike va fuila ku tambula vimamuna ku visemi, tu va vose tua fuila ku tambula vimamuna kuli Njambi. (Isaya 48:17, 18) Vitume via mu Mbimbiliya vieku tu hana vimamuna vize via pua vuana vua Njambi.​—Tandenu 2 Timoteo 3:16.

Vitume na masiko a Yehova vieku tu longesa njila ya cili ya muono ua lelo kaha vieku lekesa naua vati tu hasa ku ka uana muono ka ue ku hua ku lutue. Mu ku linga Njambi ikeye ua tu tangele, ngeci ua tu hana masiko na vitume, omo liaco tua pande ku viukilila muku a niunga.​—Tandenu Visamo 19:7, 11; Kusolola 4:11.

Vitume via Mbimbiliya via pua vusunga vua kuputukila. Kaha Masiko eku handeka mpundu ha cimo cimpande. (Ndeutelonomi 22:8) Tu na pande ku pangesa visinganieka linga tu ivuisise vati vimo vitume vieku panga ha vintsimbu vimo. (Visimo 2:10-12) Mbimbiliya ya longesa nguayo muono ua pua vuana vua tu hana Njambi. Vitume viaco vieku tu endesa nga tu li muku panga, ni ku ndzivo na mu vungendzi. Vieku tu kuasa ku litenga ku via ku pihia.​—Tandenu Vilinga 17:28.

Yesu ua handekele masiko avali a seho ya kama. Lia kuli vanga lia solola vutumbe vua muono ua muntu—vua ku tantekeya Njambi, ku mu lema na ku mu pangela mu miono yetu. Eli lisiko lia ku livanga tu na pande ku lihaka mu vihangulo viose via mu muono. (Visimo 3:6) Vaze veku niunga eli lisiko veku likuata vusamba na Njambi, va ka kala na ndzolela ya vusunga na ku tambula muono ka ue ku hua.​—Tandenu Mateo 22:36-38.

Lisiko lia mu civali li hasa ku tu kuasa ku yoya mu ciyulo na vakuetu. (1 Kolintu 13:4-7) Nga tu niunga eli lisiko tu ka hasa ku kavangeya lungano lua Njambi na ku mona vantu ngue mue ku va muena ikeye.​—Tandenu Mateo 7:12; 22:39, 40.

Vitume via Mbimbiliya vieku longesa vusoko kuli pandakana mu cilemo. Vitume via Mbimbiliya vieku longesa vusoko kuli pandakana mu cilemo (Kolose 3:12-14) Lizi lia Njambi lieku niunga naua vusoko mu ku longesa citume cikuavo— nguaco vulo kuvua pandele kutsa.​—Tandenu Njenisisi 2:24.

Ku kavangeya vilongesa via Mbimbiliya, vi hasa ku niunga vupite vuetu na vi singanieka vietu. Ku vipanga via vingi veku tonda vantu vakua vusunga na ku takama. (Visimo 10:4, 26; VaHevelu 13:18) Lizi lia Njambi lia tu longesa naua ngualio tua pande ku viukilila na vize vi tuli navio na ku haka seho ku vusamba vuetu na Njambi ku tuvakana vupite.​—Tandenu Mateo 6:24, 25, 33; 1 Timoteo 6:8-10.

Ku kava vitume via Mbimbiliya ceku niunga cihindu. (Visimo 14:30; 22:24, 25) Ku kava masiko a Njambi ku tuala ha ku penda ce ku tu niunga ku mavezi aku pihia na ku li vulumuna. (Visimo 23:20) Yehova ua tu tavesa ku nua vuala vunoni tu na pande ku puisamo. (Visamo 104:15; 1 Kolintu 6:10) Vitume via Njambi vieku tu kuasa ku niunga kati lika vilinga vunoni na visinganieka vietu. (Visamo 119:97-100) Vakua Kilistu va vusunga kave ku niunga lika masiko linga va uanemo vukuasi. Vunoni muomu va tonda ku singimika Yehova.​—Tandenu Mateo 5:14-16.