Mu vulombelo vuli vuose muakala vantu vamo vakua vucili. Ua pua muzimbu ua cili ku tantekeya nguetu Njambi ue ku va mona na ku va niunga. Vunoni ce ku neha vusiua, ku mona nguetu vantu vavengi ve ku linga vupi vua kama mu lizina lia vulombelo. (2 Kolintu 4:3, 4; 11:13-15) Tue kuivua mizimbu ya ingi i lekesa, ngecize matembele a engi va na lihaka muku lundumuna vantu vavengi, mu vi ndzita kaha ve ku linga via ka sahuntu na vanike va vandende. Mizimbu eyi yeku nehesa vusiua kuli vakua ku lemesa Njambi va vusunga!​—Tandenu Mateo 24:3-5, 11, 12.

Vulombelo vua vusunga vue ku lemesa Njambi, vunoni vulombelo vua makuli vueku mu sahula. Vakua vulombelo vua makuli ve ku longesa vize ka via litombuele na Mbimbiliya. Vilongesa viavo ku tuala hali Njambi na ha vatsi via makuli. Ngeci mukemuo Yehova ua tonda ngueni vantu vose va tantekeye vusunga.​—Tandenu Ezekiele 18:4; 1 Timoteo 2:3-5.

Ci tu hana ndzolela, ku ntantekeya nguetu Njambi ke ku tanguka na vulombelo vuli vuose vue ku handeka nguavo vua mu lema, vunoni vua lema mpundu mavu a Satana. (Tiango 4:4) Mu Mbimbiliya ma vulombelo a makuli va sana “Mbambilone ya kama,” Mbonge ya laza ku ke kuo kua fetikilile vulombelo vua makuli ku fuma ha livazi lia Noa. Vuovuno Njambi aka manusulako ma vulombelo ose eku tangula vantu na ku va pakesa.​—Tandenu Ku-solola 17:1, 2, 5, 16, 17; 18:8.

 Muzimbu u kuavo ua cili uno. Yehova ka suvile vantu vakua ku linga via cili vali mu malombelo a kuli seza-seza a makuli a ha mavu ose. Ali na ku kungulula vantu muku va longesa vusunga.​—Tandenu Mika 4:2, 5.

Yehova ue ku niunga vantu vose va lema vusunga na vucili. Ali na ku va lungula ku fuma mu vulombelo vua makuli. Vantu va lema Njambi vali na cizango ca ku-alulula miono yavo linga va mu ye ku mutima.​—Tandenu Ku-solola 18:4.

Ku sekulu ya kulivanga, mu va vuile muzimbu ua cili ku vapostolo, vantu va lema vucili va viukilile. Yehova ua va longesele vati mua ku yoyela muono ua cili na lulavelelo. Va pua lungano lua cili kuli yetu muomu va tavele muzimbu ua cili muku haka Yehova ku lutue mu miono yavo.​—Tandenu 1 Tesalonika 1:8, 9; 2:13.

Yehova ue ku tambula muacili vantu vaze ve ku fuma mu vulombelo vua makuli linga veze ha kati ka vakua ku mu lemesa. Nga u tava ku cilanio ca Yehova ku ku tambula, uka uana va vusamba vueni, vusoko vua vu ha kaha cilemo ca Yehova, na muono ka ue ku hua. ​—Tandenu Mako 10:29, 30; 2 Kolintu 6:17, 18.

U napu muzimbu ua cili ku tantekeya nguetu kusompesa ca vulombelo vua makuli cili muhiehi. Njambi aka fumisa mavu ose mu mapakeso. Na limo litangua liahi vulombelo vua makuli vuka tepesa na ku sevuisa vantu. Muntu uose aka kalako aka lipandakana muku lemesa Njambi umo lika ua vusunga.​—Tandenu Kusolola 18:20, 21; 21:3, 4.