Njambi a tonda ngueni vantu va yoye mua cili ha mavu. Ngeci ua tangele mavu na viose via kalaho muomu ua lema vantu. Vuovuno Njambi aka hana muono ua cili ku vantu mu vifuti viose. Aka fumisa ko viuma viose vie ku kokela vantu visoti.​—Tandenu Yelemiya 29:11.

Ka kuesi Vuangana vua ntsimbu ino vu na hasa ku fumisa ko vukenia, mavezi na kutsa. Vunoni muzimbu ua cili uno. Vuovuno Njambi a ka fumisa ko mavuangana ose a vantu na ku hingisa mo vuangana vueni. Vakua ku ononoka ku vuangana vua Njambi va ka yoya mu ciyulo na cihindu ca cili.​—Tandenu Isaya 25:8; 33:24; Ndaniele 2:44.

Visoti viose vi ka hua lika omo Njambi a ka nongesa vantu vakua ku linga vupi ha mavu. (Zefania 2:3) Tangua lika aka vi puisamo? Mbimbiliya ya handekele laza ha viuma vili na ku neha vuoma ku vantu lelo lino. Vilinga via ku pihia vili na ku soloka ano matangua, vilekesa ngecize ntsimbu ili ha hiehi linga Njambi a puisemo vutumbe vueni.​—Tandenu 2 Timoteo 3:1-5.

Tu na pande ku lilongesa via Njambi mu Mbimbiliya. Mbimbiliya ya pua ngue mukanda ua ku tu tuma kuli tata ua cilemo. Ye ku tu longesa vati tu hasa ku kala na muono ua cili lelo, kaha na muono ka ue ku hua ha mavu ku lutue. Mua vusunga, kati vose va ka viukilila omo vaka ku mona u li longesa Mbimbiliya. Njambi na tu kulahesa muono ka ue ku hua, kati tu tavese vakuetu ku tu tangula kuli longesa.​—Tandenu Visimo 29:25; Kusolola 14:6, 7.