Njambi ua vusunga ikeye ua tangele viuma viose. Ka kele na vusangumukilo na vumanusuilo. (Visamo 90:2) Ikeye ua pua cituta ca mizimbu ya cili ya kala mu Mbimbiliya. (1 Timoteo 1:11) Tua pande ku lemesa lika Njambi muomu ikeye ua tu hana muono.​—Tandenu Kusolola 4:11.

Na umo muntu ua mona ho laza Njambi uahi, muomu ikeye ua pua Sipilitu, eci ci lekesa ngecize cifua ca muono ueni ca liseza cikuma na uno uetu ua ntsitu na maninga. (Yoano 1:18; 4:24) Vunoni tu hasa ku tantekeya vifua vieni na visinganieka vieni ku hitila mu viuma via tangele. Nga tu tala ha ku lana ca vusuka na vintemo via kuli seza-seza, vi tu muesa cilemo ceni na mana eni. Vukama vua ano mavu vua muesa ngolo yeni.​—Tandenu Loma 1:20.

Tu hasa naua kuli longesa vifua via Njambi mu ku tanda Mbimbiliya. Lizi lia Njambi li hasa ku tu kuasa ku tantekeya via lema na vize ka lemene. Mbimbiliya i tu longesa vati Njambi ue ku muenamo vantu na vati ue ku linga nga ku na soloka vimo.​—Tandenu Visamo 103:7-10.

Yesu ua handekele ngueni: “Tatetu u li muilu, va [lelese NW] lizina liove.” (Mateo 6:9) Vutuhu Njambi va mu lundumika mazina eka na eka, ua kala na lizina lieni. Lilimi ku lilimi ve ku sana lino lizina mueka. Mu Ngangela tue ku mu sana nguetu “Yehova.”​—Tandenu Visamo 83:18.

Mu Vimbimbiliya via vingi lizina lia Yehova vali fumisamo na ku hingisamo sukulu ni Njambi. Vunoni mu va sonekele  Mbimbiliya, lizina lia Njambi lia solokele lua ku pua 7.000. Yesu ua longesele vantu lizina lia Njambi.​—Tandenu Yoano 17:26.

Talenu video Vuno Njambi ua Kala na Lizina Ni?

Vuno tuyando tu va li na ku mona vantu tu muesa ngecize Yehova ka tu hakele seho ni? Vantu va vengi ve ku handeka nguavo Njambi ue ku tu kokela lamba linga a tu eseke, vunoni via pua visaki.​—Tandenu Tiango 1:13.

Njambi ua tu singimika mu ku tu hana vuana vua kuli hanguila viose vi tu tonda. Nkuma ka ca puile ca cili kuli yetu omo Njambi ua tu hana mpoko ya kuli hanguila ku mu lemesa? (Yehosua 24:15) Vunoni vantu va vengi ve ku linga viuma via vipi ku vakuavo, ngeci mukemuo lamba i na likulisa ha mavu. Yehova ue ku-ivua vusiua ku mutima nga a mona vuhenge vua vantu.​—Tandenu Njenisisi 6:5, 6.

Yehova Njambi ue ku tu niunga. A tonda tu ka kale na muono ua ndzolela. Vuovuno aka fumisako lamba na ku nongesa vose veku neha tuyando. Eci ci muesa ngecize, Njambi na tantekeya omo lia vika na ecelela vantu va mone lamba mu ntsimbu ya i ndende. Tu ka li longesa omo lia vika mu cilongesa 8.​—Tandenu 2 Petulu 2:9; 3:7, 13.

Yehova ua tu lania ku suena kuli ikeye ku hitila mu vivundilo. Muntu uose ua kala na seho ku meso a Yehova. (Visamo 65:2; 145:18) Ua lema ku tu ecela ku vipi vietu. Njambi ue ku viukilila nga a mona ndzili i tue ku panga linga tu mu lemese, ambe nga vi ntsimbu vimo tue ku sevuka. Cipue ka tua tantulukile tu hasa ku kala mu vusamba vua cili neni.​—Tandenu Visamo 103:12-14; Tiango 4:8.

Tua pande ku lema Yehova ku tuvakana muntu nkala, muomu ikeye ua tu hana muono. (Mako 12:30) Omo u li longesa via Njambi na vize via tonda, cilemo cove ci ka likulisa u ka suena mu hiehi na Yehova.​—Tandenu 1 Timoteo 2:4; 1 Yoano 5:3.