CILONGESA 8
Omo lia Vika Njambi Necelela Vupi na Lamba?
1. Vati vua putukile vupi?
Njambi necelela vantu ku kuli sika vavene mu miaka yose eyi, linga va mone nguavo vuangana vua vantu ka vu hasa ku manusula visoti via vantu
Vupi vua putukile omo Satana ua handekele visaki via ku livanga ha mavu. Ha katete Satana ua puile kangelo ua cili ua ku tantuluka, vunoni ‘kemanene mu vusunga.’ (Yoano 8:44) Ue vuilile Njambi cipululu ngeci ua tondele va lemese ikeye. Satana ua kuisile mpuevo ua ku livanga, Eva, linga a muononoke. Andama neni ua li pandakanene kuli Eva muku muesa lisino kuli Njambi. Lisino lia Andama lia tu nehela tuyando na ku-tsa.—Tandenu Njenisisi 3:1-6, 19.
Omo Satana ua lingisile Eva ku muesa lisino kuli Njambi, ua katuile vimpata via ku-alulukila vuangana vua Njambi. Mbunga ya vantu va vengi vana li hanguila ku kala ku mutamba ua Satana muku viana Njambi ku-pua Muangana uavo. Omo lia co ngeci Satana napu “muangana ua hano ha mavu.”—Tandenu Yoano 14:30; 1 Yoano 5:19.
2. Vuno viuma via tangele Njambi via kele na cipenga ni?
Viose vieku panga Njambi via pua via ku tantuluka. Vantu na tungelo va tangele Njambi va kele na ndzili ya ku mu lemesa mu vutantuluke. (Ndeutelonomi 32:4, 5) Njambi ua tu tangele na vuana vua ku hangula ku linga via cili ni ku linga via vipi. Ovu vuana vua tu hana njila ya ku muesa cilemo cetu kuli Njambi.—Tandenu Tiango 1:13-15; 1 Yoano 5:3.
3. Omo lia vika Njambi necelela tuyando na ntsimbu ino?
Fume ha va vianena vuangana vueni, Yehova kasi necelela tuyando. Omo lia vika? Linga a muese ngecize ka kuesi vuangana na vumo vuahi vu hasa ku sika vantu mu vuoloke ca ku hona ikeye. (Ekelesiaste 7:29; 8:9) Mua hiti miaka 6.000 fume ha va putukila vantu kuli tumina vavene. Vuangana vua vantu vu na hono ku manusula ndzita, vukenia, vuhenge, na mavezi.—Tandenu Yelemiya 10:23; Loma 9:17.
Vuangana vua Njambi vua li seza cikuma na vuangana vua vantu, muomu vukevuo vue ku kuasa vaze va vu hangula. (Isaya 48:17, 18) Vuovuno Yehova aka fumisako ma vuangana a vantu ose. Vaze lika vali na ku hangula vuangana vua Njambi vakevo va ka suana mavu.—Isaya 11:9.—Tandenu Ndaniele 2:44.
Talenu video Omo lia Vika Njambi Necelela Tuyando?
4. Vika tua pande kulinga ntsimbu Njambi aci muesa ntsintsa?
Satana ua handekele ngueni na umo uahi a hasa ku pangela Yehova omo lia cilemo. U hasa ku lekesa nguove Satana ua handekele makuli. Ntsintsa ya Njambi ya tu hana ntsimbu linga tu hangule vuangana vu tua tonda nga vua Njambi ni vua vantu. Tue ku muesa vuangana vueya tua hangula muku yoya cetu.—Tandenu Yombi 1:8-12; Visimo 27:11.
5. Vati tu hasa ku hangula Njambi ku-pua Muangana uetu?
Vilinga vietu vieku muesa nga tua hangula Njambi kupua Muangana uetu ni cahi
Nga tu tonda ku hangula Njambi linga a pue Muangana uetu, tua pande kuli longesa vusunga ku tuala hali Ikeye. Cikuavo tu na pande ku mu lemesa ngue muze mu va soneka mu lizi lieni Mbimbiliya. (Yoano 4:23) Tu hasa ku viana vuangana vua Satana mu ku litenga ku via pulitika na ku ndzita, ngue mua lingile Muangana Yesu.—Tandenu Yoano 17:14.
Satana ue ku lingisa vilinga via vipi ngeci vusonde na vukenia vi soloke ngue via cili. Nga tu viana viuma via ku pihia, vamo va vusamba vuetu na va vusoko va hasa ku tu zinda. (1 Petulu 4:3, 4) Mukemuo honi tua pande ku hangula. Tu ka likata na vantu va lema Njambi ni? tu ka ononoka ku masiko a Njambi a cilemo? Nga tu ka hangula ku-ononoka Njambi, tu ka muesa nguetu Satana ua kuisile mua handekele ngueni na umo uahi a hasa ku-ononoka kuli Njambi nga a kovela mu vieseko.—Tandenu 1 Kolintu 6:9, 10; 15:33.
Njambi omo lia cilemo na likuminia ku ka fumisako vupi na tuyando. Vose vaze veku muesa nguavo va kulahela muli Ikeye vaka yoyela ha mavu miaka yose.—Tandenu Yoano 3:16.
