Njambi ua lania vantu va vifua viose ku suena kuli ikeye mu ku mu vundila. (Visamo 65:2) Vunoni, ke ku tava ni ku-ivuilila vivundilo viose. Njambi ke ku ivuilila vivundilo via yala uze ue ku yandesa mpuevo yeni. (1 Petulu 3:7) Cikuavo naua, omo va Isaleli va tualeleleho ku linga vupi Njambi ua vianene ku-ivua vivundilo viavo. Mua vusunga civundilo capua vuana vua Njambi. Muntu, ambe a vulumune muakama Njambi a hasa ku tava vivundilo vieni nga ikeye a li tavela vipi vieni na ku viseza.​—Tandenu Isaya 1:15; 55:7.

Talenu video Vuno Njambi ue ku Ivua Vivundilo Viose Ni?

Ku vundila cina pande kupua mutamba ua ku lemesa cetu, tua pande ku vundila lika kuli sakatanga uetu, Yehova. (Mateo 4:10; 6:9) Cikuavo, mu ku pua vakua vupi, tua pande ku vundila ku hitila mu lizina lia Yesu muomu ikeye ua ku tu tsililile ku vupi vuetu. (Yoano 14:6) Yehova ka tondele tu pue na ku hilukila vivundilo vimo ntsimbu yose. Njambi ua tonda ngueni vi vundilo vietu vi fuminine ku mutima.​—Tandenu Mateo 6:7; Filipu 4:6, 7.

Sakatanga uetu a hasa ku-ivua vivundilo ambe nga tu vundila mu mutima. (1 Samuele 1:12, 13) Ua tu lania ku vundila ntsimbu yose, nambe ku cimene, cinguezi, ha ntsimbu ya ku-lia kaha nga tu li mu visoti.​—Tandenu Visamo 55:22; Mateo 15:36.

Ku suena ku hiehi na Njambi ka ca puile ca casi muomu tua kala ha kati ka vantu kava tsilielele Njambi kaha veku sahula vikulaheso vieni via ku neha ciyulo ha mavu. (2 Timoteo 3:1, 4; 2 Petulu 3:3, 13) Ngeci mukemuo tue ku li kunguluila  hamo na va muanetu, linga va tu kolese kaha netu tu va kolese.​—Tandenu VaHevelu 10:24, 25.

Ku likata na vantu vaze va lema Njambi ceku tu kuasa ku suena kuli Njambi. Kuli kungulula ca va Vakaleho va Yehova ye ku pua ntsimbu ya cili ya kuli kolesa mu lutsilielo na vakuetu.​—Tandenu Loma 1:11, 12.

U hasa ku suena ku hiehi na Yehova muku singanieka ha vize vi ue kuli longesa mu lizi lieni. Ku singanieka ha viuma vi u hasa ku li longesa ha vipanga vieni, vimamuna vieni na vikulaheso vieni. Ku vundila na ku hilula ceku tu kuasa ku mona seho ya cilemo ca Njambi na mana eni.​—Tandenu Yehosua 1:8; Visamo 1:1-3.

U hasa lika ku suena kuli Njambi nga u kulahela muli ikeye, kaha nga uli na lutsilielo muli ikeye. Vunoni lutsilielo lua pua ngue cuma cili na muono ca tonda ku ci lisa. U na pande ku lisa lutsilielo luove muku hituluka linga u mone vati ci li ku kulahela cove. ​—Tandenu Mateo 4:4; VaHevelu 11:1, 6.

Yehova ue ku lela vaze vose va mu lema. A hasa ku va niunga ku viose vize vi haka lutsilielo luavo mu vusonde na kulavelela ca muono ka ue ku hua. (Visamo 91:1, 2, 7-10) Ue ku tu mamuna ku litenga ku vi njila vize vihasa ku haka mu visoti cihindu cetu na ku viukilila cetu. Yehova ue ku tu longesa ku yoya muono ua cili.​—Tandenu Visamo 73:27, 28; Tiango 4:4, 8.