CILONGESA 10
Vati mu Hasa ku Tantekeya ku Lemesa ca Vusunga?
1. Vuno kua kala Vulombelo vumo lika vua vusunga?
“Liniungenu ku vapolofeto va makuli”—MATEO 7:15.
Yesu ua longesele va ndongesi veni ngueni kua kala Vulombelo vumo lika vua vusunga. Vuapua ngue njila imo i tuala ku muono ka ue ku hua. Yesu ua handekele ngueni: “Va vandende lika va i uana.” (Mateo 7:14) Njambi ue ku tava lika vulombelo vuze vue kulongesa vize vi li mu lizi lieni, Mbimbiliya. Vose vakua ku lemesa Njambi mu vusunga vali kunguluila mu ku-tsiliela cimo.—Tandenu Yoano 4:23, 24; 14:6; Efeso 4:4, 5.
Talenu video Vuno Njambi ue ku Tava Malombelo ose ni?
2. Vika via handekele Yesu ku tuala ha vakua Kilistu va makuli?
“Va litava nguavo va tantekeya Njambi; Vunoni na vipanga viavo va mu viana.”—TITO 1:16.
Yesu ua nanguile ngueni vapolofeto va makuli, va ka tangula va kua Kilistu va vusunga. Helu veku soloka ngue va kua Kilistu va vusunga. Ku vi tembele viavo veku litumbula nguavo vakua Kilistu. Vunoni vantu vaco u hasa ku va muena ku vilinga viavo. Ku lemesa ca vusunga cikeco lika ca kala na vakua Kilistu va vusunga vaze ve kulinga via cili.—Tandenu Mateo 7:13-23.
3. Vati u hasa ku tantekeya vakua ku lemesa va vusunga?
Ku hitila mu vitantekeyeso vitanu:
-
Vakua ku lemesa Njambi va vusunga va singimika Mbimbiliya ku-pua lizi lia Njambi. Va lihakela kapandi ka ku kavangeya masiko a mu Mbimbiliya. Vulombelo vua vusunga vua litepa na vulombelo vue mana ha visinganieka via vantu. (Mateo 15:7-9) Vakua ku lemesa va vusunga kave kuambulula vieka kaha va linga vieka.—Tandenu Yoano 17:17; 2 Timoteo 3:16, 17.
-
Vandongesi va Yesu va vusunga veku singimika lizina lia Njambi, Yehova. Yesu ua muesele kasingimiko ku lizina lia Njambi muku li ambulula ku vantu. Ua kuasele vantu ku tantekeya Njambi kaha ua va longesele naua ku vundila linga lizina lia Njambi va li lelese. (Mateo 6:9, NW) Vulombelo vuka vue ku longesa lizina lia Njambi muimbo liove?—Tandenu Yoano 17:26; Loma 10:13, 14.
-
Vakua Kilistu va vusunga veku ambulula via vuangana vua Njambi. Njambi ua tumine Yesu linga a ku ambulule muzimbu ua cili ua vuangana. Vuangana vua Njambi vukevuo lika lulavelelo lua cili ku vantu. Yesu ua tualeleleho kuambulula via vuangana vua Njambi na ha litangua lia kutsa ceni. (Luka 4:43; 8:1; 23:42, 43) Ua handekele ngueni vandongesi veni navo va ka ambulula ku vantu via vuangana vua Njambi. Nga umo eza mu ku handeka nove,via vuangana vua Njambi ua ku vulombelo vuka?—Tandenu Mateo 24:14.
-
Vakua Kilistu va vusunga ka va lihakele mu vilinga via ano mavu a api. U hasa ku va tantekeya muomu kava lihakele mu pulitika na mu kuli luisa ca miyati. (Yoano 17:16; 18:36) Kaha naua, kave kuli haka mu vilinga via mavu ano a ku pihia.—Tandenu Tiango 4:4.
-
Vakua Kilistu va vusunga va kala na cilemo ca vutuntu ku umo na mukuavo. Mu Lizi lia Njambi va longesamo ku singimika miyati ya vantu vose. Vakua Vulombelo vua makuli veku kuasa vi ndzita via vakua vifuti, vunoni vakua Kilistu va vusunga va viana ku linga ngoco. (Mika 4:1-3) Cikuavo, naua vakua Kilistu va vusunga veku pangesa ntsimbu yavo na vupite vuavo muku kuasa vakuavo na ku va kolesa.—Tandenu Yoano 13:34, 35; 1 Yoano 4:20.
4. U hasa ku tantekeya Vulombelo vua vusunga ni?
Vulombelo vuka vue ku fumisa vilongesa viavuo viose mu lizi lia Njambi, vue ku singimika lizina lia Njambi, kaha vue ku ambulula Vuangana vua Njambi ku-pua vukevuo lika vuka manusula visoti via vantu? Civunga cika ce ku muesa cilemo na ku viana vi ndzita? Muku mona cove veya ve ku linga ngoco?—Tandenu 1 Yoano 3:10-12.
