Uno muzimbu ua cili u fuma kuli Yehova, Njambi ua ndzolela, uze a tonda ngueni vusoko vuose vu kale na ndzolela. (1 Timoteo 1:11) Njambi ikeye ua tumbikile vulo. Ku liambata mua ya masiko capua ca seho cikuma, muomu ce ku neha ndzolela na ku lingisa visemi va niungile hamo vanike mu njila ya cili.Vakua Kilistu va na pande ku singimika masiko a ku sonekesa vulo ku Nguvulu.​—Tandenu Luka 2:1, 4, 5.

Vati Njambi ue ku muenamo vulo? Yehova ua tonda vaze va liambata va yoye hamo miaka yose. Yehova ua tonda ngueni vamala na vampuevo va liambata va li kulahela umo na mukuavo. (Va Hevelu 13:4) Njambi ua zinda ku tsiha vulo. (Malakiya 2:16) Vunoni ua tavesa lika vakua Kilistu ku tsiha vulo nga umo ha kati kavo a linga vupangala.​—Tandenu Mateo 19:3-6, 9.

Yehova ua tangele yala na mpuevo linga va kale na muono ua mutuntu mu vulo. (Njenisisi 2:18) Mu ku pua mutue ua ndzivo, yala na pande ku tondela vakua ndzivo yeni via ku-lia, vuzalo na ku va longesa via Njambi. Yala na pande kuli hana ivene mu ku fuitangana omo lia ku lema mpuevo yeni. Vamala na vampuevo va liambata va na pande kuli lema na kuli singimika umo na mukuavo. Mu vulo vamala na vampuevo vose ve ku vulumuna, kuli longesa ku ecela vipi ca pua ca seho cikuma muomu ce ku neha ndzolela mu ndzivo.​—Tandenu Efeso 4:31, 32; 5:22-25, 33; 1 Petulu 3:7.

Nga mua kovela visoti mu vulo, mu na pande kuli niunga umo na mukuavo na cilemo. (1 Kolintu 13:4, 5) Mbimbiliya ka ya tavesele vantu ku litepa nga visoti vi na lana mu vulo.​—Tandenu 1 Kolintu 7:10-13.

Yehova ua tonda mu kale na ndzolela. Ue ku mi hana vimamuna via seho linga mu pue vakuenze na vana va vampuevo va ku longua. Njambi a tonda mu uane mana na ku tantekeya muacili muono mu ku-ononoka visemi vienu. (Kolose 3:20) Yehova a tonda naua ngueni mu uane ndzolela ya kama, mu ku mu pangela na muaneni Yesu.​—Tandenu Ekelesiaste 11:9–12:1; Mateo 19:13-15; 21:15, 16.

Mu na pande ku fuitangana linga mu tondele vana veni via ku-lia, ndzivo na vuzalo. (1 Timoteo 5:8) Vunoni linga vana venu va kale na ndzolela, mu na pande ku valongesa ku lema Njambi na kuli longesa hali ikeye. (Efeso 6:4) Nga vanike va mona cilemo cenu visemi kuli Njambi cika pua ca casi ku vana venu ku lema Njambi. Nga u longesa vana vove via mu Mbimbiliya, va kendela mu njila ya vuoloke.​—Tandenu Ndeutelonomi 6:4-7; Visimo 22:6.

Vanike veku viukilila cikuma nga visemi va va lembezieka na ku va sangala. Vana va na pande ku va handekela na ku va sungamesa. Vilongesa evi vihasa ku va niunga ku vi njila via vuhenge. (Visimo 22:15) Vunoni ka ca pandele ku veta muana na vukenia.​—Tandenu Kolose 3:21.

Vakaleho va Yehova veku soneka mavulu a engi, amo a hasa ku kuasa visemi na vana. Vilongesa viaco viose via fuma mu Mbimbiliya.​—Tandenu Visamo 19:7, 11.