CILONGESA 5
Vika Njambi ua Tangelele Mavu?
1. Omo lia Vika Njambi ua tangele Mavu?
Yehova ua hele mavu ku Vantu. Ano mavu a pua limbo lietu. Andama na Eva kava va tangelele ku sulisa melu—muomu muilu Njambi ua tangelelemo laza tungelo. (Yombi 38:4, 7) Njambi ua hakele yala ua katete mu lihia, liva lukile nguavo citungu ca Endene. (Njenisisi 2:15-17) Yehova ua kulahesele Andama na mbuto yeni yose, muono ka ue ku hua ha mavu.—Tandenu Visamo 37:29; 115:16.
Ha katete, lihia lia Endene lika lia puile citungu. Va Andama na Eva nga vakevo ve ku sulisile mavu na vana vavo. Kaha nga va sikile mavu ose na ku a puisa citungu. (Njenisisi 1:28) Mavu kava ka a nongesa. Kasi a ka tualelelaho ku-pua limbo lia vantu.—Tandenu Visamo 104:5.
Talenu video Omo Lia Vika Njambi ua Tangele Mavu?
2. Omo lia vika Mavu ku a puile Citungu?
Andama na Eva va muesele lisino kuli Yehova ngeci ua va sekuile mu Citungu. Citungu ca pihile, na umo uahi ua hasele ku ci tungulula. Mbimbiliya ya handeka nguayo: “mavu va na hie ku livoko lia vakua vipi.”—Yombi 9:24.—Tandenu Njenisisi 3:23, 24.
Vuno Yehova ua likela ku puisamo vutumbe vueni ku vantu? Houe! Muomu Njambi mukua ngolo yose ka hasa ku honoua. (Isaya 45:18) Aka hiluisila vantu ku yoya ca ntsimbu yose ngue ku cizango ceni ca laza.—Tandenu Visamo 37:11, 34.
3. Vati Citungu vaka ci tungulula?
Citungu vaka ci tungulula ha mavu omo Yesu aka pua Muangana ua vuangana vua Njambi. Mu ndzita ya Alemangendo, Yesu a keza na tungelo mu ku nongesa vose vaze vali na ku viana ku-ononoka kuli Njambi. Kaha Yesu aka kuata Satana na ku mu kuta miaka 1.000. Vangamba va Njambi va kovoka ku ku nonga muomu Yesu aka va tuamenena na ku va niunga. Vaka viukilila muafua vaka tambula muono ka ue ku hua mu citungu ca ciha ha mavu.—Tandenu Kusolola 20:1-3; 21:3, 4.
4. Vuno tangua lika tuyando tu ka hua?
Tangua lika Njambi aka manusula vupi ha mavu? Yesu ua lekele va ndongesi veni “citantekeyeso” cika muesa ngecize ku-kotoka cili mu hiehi. Viuma vili na ku soloka lelo lino, vili na ku neha vuoma ku vantu, eci cimuesa ngecize tu li na ku yoyela ku matangua aku kotokela.—Tandenu Mateu 24:3, 7-14, 21, 22.
Yesu aka fumisa tuyando tuose ha mavu mu likulukazi lia miaka ya ku sika ceni muilu. (Isaya 9:6, 7; 11:9) Mu kupua Muangana na Sasendote ua kama Yesu aka fumisa vupi vua vose vaze va lema Njambi. Ku hitila muli Yesu Njambi aka fumisa mavezi, ku kulupa na ku-tsa.—Tandenu Isaya 25:8; 33:24.
5. Iya aka yoya mu Citungu ca ciha?
Ku vindzivo via vuangana via Vakaleho va Yehova, u ka uana ko vantu va lema Njambi kaha va tonda kuli longesa ku linga vize via mu ya ku mutima
Vantu vose ve ku-ononoka kuli Njambi va ka yoya mu Citungu. (1 Yoano 2:17) Yesu ua tumine vandongesi veni linga vaka tonde vakua ku konkama. Linga va va longese vati va hasa ku uana kavumbi ku meso a Njambi. Lelo lino, Njambi ali na ku-viukisa makulukazi a vantu linga va ka yoyele ha mavu ku lutue. (Zefania 2:3) Ku Vindzivo via Vuangana via Vakaleho va Yehova, vantu ve ku lilongesa vati mua ku-puila vamala na vampuevo va cili. Vanike na visemi veku lemesa hamo na kuli longesa mua ku uanena nganio mu muzimbu uno ua cili.—Tandenu Mika 4:1-4.
